Jowai, Nohprah 13
Ka District Mission Coordinator, SSA West Jaiñtia Hills ha ka thong ban kyntiew ïa ka pule puthi hapoh ka District, ha ka 13 tarik Nohprah ka la pynlong ïa ka jinghikai kyrpang ïa ki Principal, Head Teacher jong ki skul ha Inclusive Education Resource Centre (IERS), Mihmyntdu.
Ka thong jong jong kane ka jinghikai ka long ban pynsngewthuh ïa ki Principal, Head Teacher jong ki skul shaphang ka kamram kum ki bor peit bor pynïaid jong ki skul na ka bynta kito ki khynnah ba don ha ki jingduna dkhot met bad ruh shaphang ka hok jong ki khynnah katkum ka RPWD Act 2016.
U LK Singh, District Co-Ordinator IE, SSA West Jaiñtia Hills kum u ‘riew shemphang, u ong ba don lai tylli ki skul kiba la mang kyrpang na ka bynta kito ki khynnah kiba don ha ki jingduna dkhot met kita ki long ka skul ïa kito ki khynnah kiba don jingduna ka pyrkhat pyrdaiñ Mental Retardation, ka jingduna ha ki bor ïohsngew Hearing impaired bad ka skul kaba ïadei bad kito ki khynnah ki bym ïohi Visual impaired.
Hapoh ka jylla, ïa kum kine ki jait skul ki long kiba dang duna, kumta ka buh jingeh bha ïa ki kmie ki kpa ban phah skul ïa ki khun jong ki na ka bynta ban ïoh jingnang jingstad kumba dawa ka jinglong jingman jong ki. Hynrei watla katta ruh hapoh ka District kumba shah ka bor ki la pyrshang ban leh kaba bha tam da kaba buh ha man ki block ïa ki IE Volunteer bad ki Block Resource Person IE. Shuh shuh u la batai bniah ruh ïa ki 12 tylli ki jait jingpang kiba hap hapoh ka RPWD Act 2016 bad ka National Trust Act bad u la kyntu ïa ki Head Teacher/ Principal ban ai mynsiem ïa ki kmie ki kpa lada jia ba ki don ïa ki khun kiba don jingduna dkhot met.
