Shillong, Nailur 13
U Superintendent of Police (SP) ka East Khasi Hills, Bah Sylvester Nongtnger ha ka Sngi Balang u la ong ba bun na ki jingjia aksiden ha nongbah Shillong ki dei namar ka jingñiah kali ha ka por ba la shoh u khawiang.
“Ngi kyrpad ïa ki samla bad nongñiah – wat ñiah kali ynda la dih kyiad la ki dei ïa ki 2 shaka ne 4 shaka ban lait na ki jingjia ba sngewsih ne ki jingjia aksiden khamtam ha ki surok-bah,” la ong u Bah Nongtnger.
U la ong ruh ba katkum ki jingtip ba la ïoh lum, kiba bun na ki jingjia aksiden ha nongbah Shillong ki dei namar ka jingñiah kali ha ka por ba la shoh u khawiang.
Haba kylli kumno ka tnad kan tehlakam ïa ka jingñiah kali khlemakor jong ki samla, u SP u la ong ba ka kynhun ka Shillong Traffic Police (STP) ka peitngor ïa kane ka bynta bad ka pyntyllun ïa ka kam na ka por sha ka por.
“Phi la ïohi ïa ka jingkurup ïa ki tyndong pynmih tdem ba sawa bad kumta ter-ter. Na ka por sha ka por, ngi peitngor ruh ym tang ïa kane hynrei haba ïadei bad ka jingñiah kali khlemakor,” u la ong.
Utei u heh pulit ka distrik u la ong ruh ba ka tnad ka ju pynïeng ïa ki ‘Naka’ bad kane ka kam kan bteng ban peitngor ïa ki nongñiah khnang ba kin ym pynher sted ïa ki kali ne 2 shaka haba ki ñiah ïa ki.
Ban bynrap ïa katei ka bynta, u SP (City), Bah Vivek Syiem u la ong ba ka STP ka la pynap ha ki jaka bapher-bapher ban peitngor ïa ki kali bad 2 shaka khamtam ha ka por mynmiet kumjuh ïa ki samla kiba ñiah kali hapdeng ka jingshoh u khawiang.
“Ngi sngewkhia ïa ki khun samla kiba ñiah kali bad dih kyiad ha kajuh ka por, ka jingñiah kali jong kito ki bym pat ïoh laisen. Kumta ngi la pynïeng ki ‘Naka’ ban peitngor bad hadien kane, la shem ba kane ka la hiar,” u la ong.
U Bah Syiem u la buh ruh ka jingkyrpad sha ki kmie ki kpa ba kin ym ai 2 shaka sha la ki khun katba kim pat ïoh laisen bad kim bit hi ruh ban dih kyiad haba ki ñiah kali lym kumta kan ïalam sha ki jingjia ba sngewsih.
“Ngi la ïohi ba kine ki aksiden ki ju ïalam ruh sha ka jingïap briew khamtam ïa ki 2 shaka,” u la ong.
Ka tnad ka ju lap ruh ïa kito ki nongñiah kiba pynkheiñ ïa ki kyndon da kaba rung ïa ki jaka ba la buh ‘No Entry’.
Shuh shuh u la bynrap ba ka STP ka trei borbah ban khmih bniah khnang ba kan ym don ka jingñiah khlemakor ne ban lait na kino-kino ka jingjia ba sngewsih kumjuh ka jingpynthut ïa ka imlang-sahlang.
“Ka tnad ka peitngor ruh ïa ka jingpynheh jong ki kor pynsawa ba la teh ha ki kali nalor ka jingñiah kali ha ryngkat ka jingdih kyiad. Ngi peit lut ïa kine. Kane kan bteng,” la ong u SP (City).
