Shillong, Nohprah 13
U Myntri Rangbah ka Jylla u Conrad K Sangma ha ka Sngi Balang u la pyntip ba ka Sorkar Jylla haduh mynta kam pat shym la ïoh dak kaba shai na ka Sorkar Kmie ha kaba ïadei bad ka Inner Line Permit (ILP) bad ha kajuh ka por ka amendment jong ka MRSSA, kaba long pat kawei ka atiar ban ïada na ka jingwan buhai shnong ki briew ba nabar, ka la shah pynphai noh na ka bynta ban khmih bniah biang namar ka jingïatyngkhuh bad ki kyndon ka Parliament.
“Ka Sorkar Kmie ka la pynphai noh ïa ka bill da kaba ong ba hap ban khmih bniah biang ïa kane ka bill namar ki katto katne ki kyndon kim ïadei ne ïaid lait na ki kyndon jong ka riti synshar paidbah,” la ong u Myntri Rangbah haba kren sha ki lad pathai khubor ha ka Sngi Balang.
U la ong hadien ka jingïoh jingpyntip na ka Sorkar Kmie, ka Sorkar Jylla mynta ka dang peit bad khmih bniah ïa ka MRSSA, bad ka jingïakren bad ki nongïalam bapher bapher halor kane ka kam, kan sa long shen.
U la ong, “Ha kaba ïadei bad ka mat jong ka jingwan rung kyrthep ki briew kiba nabar, la shim ïa ki lad ki lynti ha ki liang bapher bapher bad kam mut ba ym shym la leh eiei, kum ka jingbuh Infiltration Check Gates ne ka jingtrei jong ki tnat bapher bapher ban lap ïa kum kitei ki briew bad ban phah leit phai noh ïa ki”.
U la ong ba ka sorkar jylla kan sa khmih bniah biang bad ka la sdang ban ïakren bad kiba bun kiba donbynta ha kane ka kam bad ka la ïakren ruh bad ka kynhun ki nongïasaid aiñ bad u Advocate General ka jylla kumno ban ïaid shakhmat bad kane ka bynta.
U Myntri Rangbah u la ong ruh ba u don ïa ka jingthmu ban lum ïa ka jingïalang bad ki kynhun bapher bapher bad ïa kane yn sa leh noh ha u snem thymmai.
