Shillong, Nohprah 13
Ka jingtei ïa ka ïew ha Laitumkhrah lyngba ka projek Smart City yn pyndep noh ha u Rymphang, 2024. Kane ka dei ka projek kaba T.38 klur.
Kane ka long katkum ka jingbuhthong hadien ba u Symbud Myntri Rangbah uba peit ïa ka tnat pynroi Sor, u Bah Sniawbhalang Dhar u la leit ban khmih ïa ki projek kiba la pyntrei lyngba ka Smart City ha kane ka nongbah Shillong ha ka Sngi Balang.
U Bah Sniawbhalang Dhar u la pynpaw ka jingkmen ban ïohi ba ka kam ka la ïaid shakhmat ha kaba la kyrmen bad buhthong ban pyndep beit ha u Rymphang, 2024. Ha kane ka jingleit jurip ïa bun tylli ki projek khamtam ha Laitumkhrah ryngkat ka jingdonlang ka Kong Ampareen Lyngdoh kaba dei ka MLA ka East Shillong konstitwensi bad ha kajuh ka por ka Myntri Sorkar. U Bah Sniawbhalang u la ong hadien ba la pyndep ïa kane ka wat kaba nyngkong, yn sa ïaid sa sha ka wat ka ba-ar jong ka jingtei. Ka jingshlem ban pyndep la daw ka daw ba shah pynwit ha ka por COVID-19.
Ka ïew ha Laitumkhrah ka dei kaba yn don 183 tylli ki dukan bad ka jaka ïeng kali kaba lah ban ngiam palat 100 tylli ki kali. Ka Kong Ampareen ka la pynpaw ka jingkmen bad ai khublei ïa u Symbud Myntri Rangbah uba la kloi ban leit peit ïa ka jingïaid jong ka jingpyntrei ïa ka projek.
Ka Kong Ampareen ka la ai burom ruh ïa u kpa jong ka u Bah Peter G Marbañiang ha kaba ka la pynkynmaw ba 27 snem hadien ba u la khlad noh, la lah ban pynurlong ïa kane ka projek na ka bynta ki paidbah ka thaiñ Laitumkrah.
Kane ka MLA kaba dei ruh ka Myntri Sorkar ka la ong ba ka projek kaba bud kan dei kaba kham heh ha kaba yn kynthup lang ïa ka jaka shnong kaba don ha syndah bad kane ka ïew ka ban long ka jingmyntoi ïa ki paidbah naduh kiba shong ïew bad kiba wan sha kane ka ïew.
