Nongpoh, Nohprah 13
Ki pulit jong ka Ri Bhoi District ha ka janmiet ka Sngi Balang ki la khang noh shipor ïa baroh ki kali ban kiew sha ka nongbah Shillong ha lad Umïam bad la bthah ba kin ïaid noh lyngba ka surok Umroi Airport-Umrynjah ter ter kaba mih sha Mawlai, kaba ju tip ruh kum ka surok VIP, katba ïa ki kali kiba hiar na ka nongbah Shillong, la shah ba kin ïaid lyngba katei ka jingkieng kumba ju long.
Kane ka jingkhang jong ki pulit ka dei hadien ba na ka liang ka kompani kaba la ïoh ban pyntrei ïa katei ka kam, ka la sdang ban sam thliew na ka bynta ban thep dewbilat sha ki trai duh jong katei ka ‘dam’ kaba la nang tlor kat nang mih ki sngi namar ka jingïoh ïaid mon jong ki trok kiba kit khia palat pud.
Ka jingpynïaid ïa ki kali kiba kiew sha ka nongbah Shillong lyngba ka surok VIP na Umroi Airport ka dei ruh kum shi bynta ban pyllait na ka dheng kali hapoh katei ka jingkieng Dam kumba la sakhi ha kane ka sngi namar shiliang jong ka jingkieng, la ker bad la sdang ban sam thliew da ka ITC Cementation India Ltd, ka kompani kaba la ïoh ban pyntrei ïa katei ka kam.
Haba ïoh ban ïakren bad u Construction Manager katei ka kompani, u Hanuman Kalamb, u la pyntip ba ka dewbilat ha ki bynta kiba sha trai duh jong katei ka jingkieng ka la pra bad nang jot kat nang mih ki sngi namar ka jingïaid jong ki kali kiba khia. Nalor nangta u la pyntip ruh ba na ka liang ka kompani kan hap ban sam thliew shaduh kitei ki bynta kiba sha trai duh ka jingkieng ban thep dewbilat thymmai khnang ban pynkhlaiñ biang ïa katei ka jingkieng ba kan long kaba shngaiñ ïa ki paidbah nongleit nongwan.
U Kalamb u la ïathuh ruh ba kan shim por la kumno-kumno haduh saw bnai tam eiei ban pyndep ïa katei ka kam bad pyntip ruh tang ban ksam ïa kawei ka thliew, kan shim por haduh ar sngi lynter bad pyntip ruh ba na ka liang ka kompani kan pyrshang ban trei sngi bad miet ban pyndep kloi katba lah ïa katei ka jingkieng.
Ha kane ka sngi la ïoh ban sakhi ba bun na ki paidbah nongleit nongwan khamtam kito kiba wan na kiwei ki jylla, ki la sah ha ka umdum halor katei ka jingpynïaid ïa ki kali lyngba ka surok Umroi Airport-Umrynjah ter ter lyngba ka surok VIP kaba mih sha Mawlai, namar kiba bun kim tip ne ithuh satia ïa katei ka surok.
Kumjuh ruh na ka liang kiba bun ki paidbah ki la pynpaw ka jingsngew bitar halor kane ka jingkhang syndet ïa ki kali ban kiew bad ong ba ha ka jingshisha la dei ban ai jingtip lypa hynrei ban shu leh hakdak kumne ka buh jingeh shi katdei eh ha ka leit ka wan khamtam lei kiba wan shah sumar bad shim dawai na Guwahati.
Shuh shuh haba pyrshang wad jingtip na ki pulit, hato katei ka jingpynkylla ïa ka lynti ïaid jong ki kali ba kiew sha ka nongbah Shillong kan neh beit tat haduh ban da dep ka jingmaramot ïa ka jingkieng. Uwei na ki heh pulit ka Ri Bhoi u la pyntip ba um pat lah ban ong eiei halor kata, bad ïathuh ba na ka liang ki bor pynïaid District ka Ri Bhoi kin sa pynshai ïa ki paidbah halor katei ka bynta.
