Shillong, Nohprah 13
U Myntri Rangbah ka jylla u Conrad K Sangma u la ong ba ka jingtrei na ka bynta ka jingshna ïa ka projek surok na Shillong sha Dawki kan sa sdang noh shen.
Haba kren sha ki lad pathai khubor ha ka Sngi Balang, u Myntri Rangbah u la ong ba dang shen ka National Highways and Infrastructure Develop-ment Corporation Limited (NHIDCL) ka la dep ban aiti biang ïa ka kam, kata ha ki ar bad lai tylli ki song (package) sha ki kontraktor kiba thymmai.
“Ngi la dep ban don ka jingïalang khmih bniah ha ryngkat bad ki kontraktor kiba thymmai, mynta dang 10 ne 15 sngi eiei bad ka jingthmu hi ka long ban peit ïa ka jingpynkhreh ka jong ki bad ban ai dak noh namar kane ka dang dei ka aïom treikam bad kumta la bthah ba kin ïaleh katba lah ban pynïaid ïa ka kam ha kine ki 6 bnai ban wan,” u la ong.
“Ngi la ïoh pdiang ka jubab kaba biang na ki bad ngi khmih lynti ba ki tiar ki tar bad kiwei ki jingdonkam lem ki nongtrei yn sa lah ban pynbit pynbiang noh ha kine ki khyndiat sngi khnang ba ngin ïohi ba ka jingtrei kan sdang noh shaid shaid,” la ong u Myntri Rangbah.
Haba kylli, u Conrad u la ong ba ki don bun ki daw kiba la pynlong ïa ka jingsangeh bad ban ieh noh shiteng da ki kontraktor barim.
“Kam don satia tang kawei ka daw na ka bynta kine ki package bapher bapher jong ka jingpyntrei surok hynrei ki don bun bah, ki don ki bynta ba la mad ïa ka jingeh ban ïoh jingbit na ka tnat Forest, ki don ki bynta kiba la shem jingeh ha kaban pynkynriah ïa ki tar ki tar, ki don ki jingeh ha kaban ïoh ïa ka jaka bad kala don ruh ka jingeh bad ki katto katne ki shnong ha kaba kala don ka jingpyrshah jong ki katto-katne ki kynhun bad ki don ki khep pat ba mad jingeh bad ka jaka,” la ong u Myntri Rangbah.
U la ong ba wat hapdeng ki jingeh kiba bun hynrei na ka liang jong ka sorkar ryngkat ki ophisar ki la trei shitom bad ha kaba la lah ban ïaid lyngba ïa kiba bun ki jingeh bad kumta la khmih lynti ba kane ka projek surok na Shillong sha Dawki ruh kan sa ïaid beit.
