Shillong, Nohprah 13
U Myntri Rangbah ka Jylla u Conrad K Sangma ha ka Sngi Balang u la ong ba ka jingpyllait jamin ïa ki dkhot ba la shah kem jong ka North East Petroleum Mazdoor Union (NEPMU) kan shong ha ka ïingbishar ym ha ka sorkar jylla.
Katkum ka jingpynpaw jong u Myntri Rangbah, la ong ba kam don satia ka jingduna ha kaba wan pynpoi ne pynkit umphniang petrol bad diesel shapoh ka jylla Meghalaya bad kumta ki paidbah kim dei satia ban kulmar jingmut.
Kane ka jingpynpaw jong u Myntri Rangbah ka la long halor ka jingdawa jong ka NEPMU ban pyllait noh ïa ki dkhot jong ka napoh patok, bad lada ym lah, kim banse ban sangeh noh ka wan kit umphniang sha Meghalaya ba ki la sdang naduh ka Sngi Ba-ar.
Haba kren sha ki lad pathai khubor, u Conrad u la ong, “Ngi la dep ban ïakren bad baroh bad kane ka kam mynta ka don hapoh ka ïingbishar. Ki la kyrpad ban ai jamin hynrei ka jingai jamin kan shong beit tang ha ka ïingbishar bad ym da ka sorkar bad kumta kane ka kam ruh ka dang ïaid shakhmat.”
“Hynrei watla ka kam ka dang ïaid, ki la don pat ki nongpynpoi umphniang ki bym hun bad ruh kito kiwei ki bym hun bad kumta ka jingïakren ka dang ïaid bad ruh na ka liang ka sorkar ka la ïaleh katba lah ban pynthikna ba ki paidbah kim dei ban shah ktah satia,” u la ong.
Haba buh ka jingkyrpad sha ki paidbah ba kim dei ban don ka jingkulmar jingmut, u Myntri Rangbah u la ong, “Ha kum kane ka por ba mynta, nga kyrpad ïa ki paidbah ba kim dei ban khuslai halor kane bad lada ka poi ruh ha kumta kata ka jinglong jingman, ka sorkar kan sa pyntip sha ki paidbah, kumta kam bha ban shu sngap ïa ki jingpynbna kiba shu long hamsaïa namar kumba ka long mynta kam pat shym la jia satia kumba ka paw mynta.”
“Hooid ka don ka jingeh, kata ha kaba ïadei bad ka jingïakren kaba dang ïaid shakhmat bad ngi dang pyrshang ban pynbeit ïa ka hynrei pat kam don satia ka jingduna ha ka jingwan poi ka umphniang shapoh ka jylla, kumta ki paidbah kim dei ban khih khuslai bad lada ka don eiei kaba kum kata, ngin sa pyntip,” la ai jingkular u Myntri Rangbah.
