New Delhi, Nohprah 13 (UNI)
Ha ka sngi ba ka Ri India ka la kynmaw ïa ka jingdap 22 snem ka jingshah thombor ka Parliament, ka Dorbar Lok Sabha ha ka Sngi Balang ka la lynguh da ka tdem hadien ba arngut na ki ‘riew paidbah kiba la wan shong ban peitkai ïa ka dorbar ki la kynthih na jaka shong sha ka lympung dorbar katba ki MP ki dang ïatai bad ki la kawang ruh da ki tyndong lyer ba mih da ka rong stem.
Kane ka jingjia ka la pynkyndit ïa ka Ri baroh kawei khamtam ba ka la leit jia ha ka sngi ba la kynmaw ïa ka jingdap 22 snem ka jingshah thombor ka Parliament ha ki ‘riew kieng atiar ha ka 13 tarik Nohprah, 2001.
Kitei arngut kiba la kynthih na jaka shong ban leit sha ka jaka ba don ki MP ki dei kiba tip kyrteng kum u Sagar Sharman bad u Manoranjan. Ka jingkynthih jong ki ka la long hadien ka por 1 baje noh sngi katba ki MP ki dang ïatai ha ka kynta jong ka ‘Zero Hour’.
Dei u Sagar uba la kynthih nyngkong eh na ka jaka ba u la shong kaba don halor jong ka jaka shong ki MP. Hadien ba u la kynthih shapoh, u la ryngkoh na kawei ka ben sha kawei pat. Hynrei ma u bad u Manoranjan ki la shah bat ha ki MP kiba la shoh la dat ïa ki hashwa ba ki pulit ka Delhi kin wan ban shimti bad kem ïa ki.
Sa arngut kiwei pat, ka Neelam, 42 snem ka rta, bad Amol, 25 snem ka rta, ki la shah kem halor ka jingkynnoh ba ki la bret da ki tyndong lyer hakhmat ka Transport Bhavan. Ka Neelam ka dei na Hisar, Haryana katba u Amol u dei na Latur, Maharashtra.
Nalorkata, ka khubor ka ïathuh ba u Sagar u dei uba sah ha Ramnagar, Lucknow ha ka jylla Uttar Pradesh, bad u dei tang u nongñiah ‘rickshaw’.
La ong ruh ba u Sagar u la ïoh ïa ka kot ban rung sha Parliament ba la ai da u MP ka Lok Sabha ka seng BJP na Mysuru, u Pratap Simha.
Ha kaba ïadei bad katei ka jingjia, ka tnat Korbar Ri ka la thaw da ka kynhun tohkit. Kane ka tnat ka la pyntip ba ïa ka kynhun tohkit yn khlieh da u Director-General ka tnat CRPF, u Anish Dayal Singh bad kin don ruh sa kiwei pat ki dkhot na ki tnat pahara bapher-bapher bad ki ‘riew shemphang.
Ka tnat ka la ong ba la thaw ïa ka kynhun tohkit hadien ba la ïoh pdiang ïa ka jingkyrpad na ka Lok Sabha Secretariat.
“Ka kynhun tohkit kan peit halor ki daw ba la mih ka jingsynjor ha ka rukom pahara ha Parliament, ban ithuh ïa ki jingduna/jingbakla bad ban ai jingmut kumno ban leh. Kane ka kynhun kan sa aiti ïa ka kaiphod kham kloi katba lah ha ryngkat ki jingai jingmut kumno ban pynkhlaiñ ïa ka rukom pahara ha Parliament,” la ong u nongaiktien ka tnat Korbar Ri.
Na ka liang u Lamphang ka Lok Sabha, u Om Bira, u la ai hukum ban tohkit halor katei ka jingjia. U la ai jingïaroh ruh ïa ki bor pahara bad ki MP kiba la bat ïa kitei ki arngut hadien ba ki la kynthih na ki jaka shong.
U Birla u la khot da ka jingïalang jong baroh ki seng saiñpyrthei ban ïakren halor katei ka jingjia bad u la ïathuh ba la aiti sha ka tnat pulit ka Delhi ban tohkit.
U la ong ba katkum ka jingtohkit ba malu ma?a, ka lyer ba la mih na ki tyndong ba la rah da kitei ki arngut ka long ka bym don jingma eiei ïa ka jingim briew.
Na ka liang ki pulit ka Delhi ki la tohkit ïa kitei ki saw ngut kiba la shah kem na shapoh bad shabar ka Parliament, bad ha kajuh ka por ki dang thwet sa ïa kiwei pat kiba lah ban donkti lang bad ki ban leh ïa katei ka kam be-aiñ.
