Shillong, Nohprah 13
Ki nongtrei ka Khasi Hills Autonomous District Council (KHADC) kin sa lah ban ïoh jingmyntoi noh shen haba shah sumar na ki jingpang jingshitom hadien ba ka Executive Committee hapoh ka jingïalam u Bah Pynïaid Sing Syiem kum u Chief Executive Member (CEM) ka la ai jingmynjur ban pyntreikam ïa kane na ka bynta kumba 800 ngut ki nongtrei jong ka Council.
Haba kren sha ki lad pathai khubor, u Bah Pynïaid Sing Syiem u la ïathuh ba ki nongtrei ki donkam ïa ka lad jingïarap ban phah sumar khamtam haba mad jingeh ha ka liang ka pisa bad na ka liang ka EC ka la sngewdei ban thawlad da kaba pyntreikam ïa kane ka kynjah skhim lyngba ka jingïateh bad ka State Bank of India (SBI).
Lyngba kane, ki nongtrei ka Council ki lah ban ïoh jingsumar ha ki jaka sumar kiba don ha kane ka Jylla bad katto-katne shabar Jylla kum ka jaka sumar ha Vellore.
Ka KHADC kan pynsiew ïa ka bai thep pisa kaba long kumba T. 15 lak shisnem na ka bynta baroh ki nongtrei, bad ka jingmyntoi kaba ki nongtrei ki lah ban ïoh kum ka bai sumar marwei ha ka shisnem ka long hapdeng T.3 lak bad T. 7.5 lak marwei tangba ka shong katkum ka rta jong ki.
U CEM u la ong ba kane kan long ka jingïarap bad jingmyntoi ïa ki nongtrei kiba mad jingeh ban ïoh pisa ban phah sumar.
