Shillong, Nohprah 13
Ha ka step jong ka 13 tarik u Nohprah mynta u snem, kawei ka dur ka la saphriang ha kylleng ki rynsan ‘Social Media’ ha kaba ha katei ka dur la ïohi ïa ka metïap jong iwei i khyllung i ba la per ha sla um jong ka Wahumkhrah kaba don ha ka bynta jong ka Madan Ïewrynghep, Mawlai.
Katkum ki tyllong khubor ba la ïohpdiang la ïathuh ba itei khyllung i dei i kynthei.
Na ka liang ki nongshong shnong katei ka thaiñ haba ïohi ïa katei ka metïap jong i khyllung kaba la per ha sla um, ki la pyntip mar-mar sha ki pulit. Na ka liang ki pulit ruh ki la leit mar-mar sha katei ka jaka ban khwai noh ïa ka metïap jong itei i khyllung bad la pynkit noh ïa ka metïap sha Shillong Civil Hosiptal ban leh ïa kaba donkam. Kum ha kiwei kiwei ki jingjia bret khyllung, ki kmie ki kpa ne ki nongpeit ki ju bret ïa ki khyllung jong ki kiba dang shu kha ha kiwei kiwei ki jaka hynrei kum kane ka jingjia bret khyllung shapoh ka wah, ka dei ka sien kaba nyngkong hapoh ka jylla.
Na ka liang u Superintendent of Police (Shillong City), u Bah Vivek Syiem u la ïathuh ïa katei ka metïap jong itei i khyllung kynthei la ïoh ban sei na katei ka wah da ka Search and Rescue Team ha ka por janmiet bad u la ong ba ka jingtohkit halor kane ka jingjia ka dang ïaid shakhmat.
