Shillong, Naiwieng 13
Hadien ba ka tnad Directorate of Education Research & Training (DERT) ka Sorkar Jylla ka la pynmih ïa artylli ki jingpynbna kaba dei ha ka 6 tarik bad ka 8 tarik u Nohprah, 2023 ha kaba ïadei bad ki nongïakhun ïa ka eksamin Meghalaya Teacher Eligibility Test (MTET) 2023 kaba la pynlong ha ka 1 tarik u Nohprah 2023. Na ka liang ki nonghikai Contractual hapoh ka jylla kiba don hapoh ka synjuk jong ka Meghalaya Government Lower Primary Contractual Teachers’ Association (MGLPSTA) ki la lap ba kiba bun ki jubab halor ki jingkylli lane ki ‘Answer Keys’ ba la pynmih ki long kiba bakla wat ha ka sien kaba ar ruh.
Ha kaba ïadei bad kane ka jingmih jong ka DERT ïa ki ‘Answer Keys’, na ka liang ki nongkitkam jong ka synjuk ki la leit ban ïakynduh ïa ka Director bad u Joint Director ka DERT ha ka 13 tarik u Nohprah mynta u snem. Pynban kaba sngewsih pat ka long ba kitei ki heh sorkar ki la ong pynban ba kin ym lah shuh ban pynmih biang ïa ki ‘Answer Keys’ sa shisien pat hynrei ki hap ap beit ïa ki jingujor ba ki nonghikai ne kiba thoh eksain kin ujor.
Ka kynhun ka la buh jingkylli la hato kane ka jingleh ka DERT ka long kaba shai bad kaba khuid lada kam pynmih ïa ki ‘Answer Keys’ pat bad hato kine ki heh sorkar ki ap ban ai jubab na ki nongthoh eksam ym na ki nongset jingkylli.
“Lada ngi ki nonghikai ngi leh kumne ha ka por ba ngi la hikai ha ki 10 snem mynshuwa ki la long kumno tharai ki khynnah skul ka jylla?”, la buh jingkylli ka synjuk.
Shuh shuh ka kynhun ka la pyntip ba na ka liang ki nonghikai ‘Contractual’ kim shaniah shuh ïa kane ka jingleh ka DERT bad ka kynhun ka la ong ba lehse kane ka jingleh ka DERT ka don eiei sha lyndet.
Katei ka kynhun lyngba u kyrwoh ba la phah da u President ka MGLPSTA, u Bah Birbor Riangtem u la ong ha katei ka jingïakren bad ki heh jong ka DERT, ki la ong pynban ba ki lah ban leit mih sha u Myntri ka tnad pule puthi ka jylla, u Rakkam A Sangma ha kaba ïadei bad kane.
”Ka jingkylli ka long ba hato kane ka jingleh kumne jong ka DERT ka dei ka jingbthah ka sorkar u Myntri Rangbah, u Conrad K Sangma bad u Myntri ka tnad pule puthi, u Rakkam A. Sangma ba ki sa pynmih arsien ïa ki ‘Answer Keys’ ka MTET Exams 2023 hynrei kiba bakla baroh arsien”, la ong u Bah Birbor.
U Bah Birbor u la ong ba ki don ki nongthoh eksam kiba sah sha ki jaka kyndong ki bym don ‘network’ bad kumta kane ka buh jingeh ïa ki ban kin ïoh ban ujor lyngba ka ‘website’ jong ka DERT.
“Lada ka DERT kam shimkhia ban pynhun ïa ki nongthoh eksam, ka synjuk kan sa shim da kawei pat ka sienjam kaba kham eh nangne shakhmat,” la ong u Bah Birbor.
