Shillong, Nohprah 13
Ka seng riewlum kaba la rim tam hapoh ka jylla kata ka Hill State People’s Democratic Party (HSPDP) ka la nang hiar katba dang mih ki sngi namar ka jingiehnoh kam jong ki nongïalam kiba hakhmat duh jong ka seng.
Ha ki khyndiat bnai ba la dep, u President jong ka HSPDP Youth Wing, u Bah Sandondor Ryntathiang u la ïehnoh kam na katei ka seng. Kumta ha kane ka sien kaba mynta ruh na ka liang u General Secre-tary ka HSPDP Youth Wing ruh, u Bah Michael Thongni u la iehnoh ïa katei ka kam napoh ka seng. U Bah Thongni u la phah ïa ka shithi iehnoh kam jong u ha ka 13 tarik u Nohprah 2023 sha u President bad u General Secretary jong ka HSPDP Central Executive Committee (CEC). Ha katei ka shithi u la kdew shai ba ka jingiehnoh kam jong u ka dei na ka daw shimet kaba u kwah ban shakri ïa ki paidbah da kawei pat ka lynti.
“Nga kwah ban pyntip sha ki paidbah baroh ba nga don ka jingthmu bad nga la shim ïa ka rai ba ngan iehnoh kam na ka kam kaba nga bat kum u General Secretary ka State Youth Wing ka seng HSPDP bad ka jingiehnoh kam jong nga ka dei beit namar ba nga don ïa ki jingthmu ban shakri ïa ki paidbah da kawei pat ka lynti”, la ong u Bah Thongni.
Shuh shuh u Bah Thongni u la ong ba kum u samla rangbah u don ïa la ka jong ka jingïohi ka jong u bad u sngewdei ba ka rukom shakri ka jong u ïa u paidbah ka don ha kawei pat ka lynti ïa kaba ki la thmu ban ïaleit lang kum ka kynhun. U Bah Thongni u la ong ba kum ka kynhun ki don ïa ka jingmut bad ka thong kaba skhem bad kata ka long ban shakri ïa u paidbah ha ka lynti kaba khuid bad kaba shai.
“Nga ruh nga don ïa kata hi kajuh ka jingthmu ïa kaba ngin ïaleit lang ban pynïasoh ha kine ki por ban wan bad ngin ïaleit beit sha ka seng VPP”, la ong u Bah Thongni.
Shuh shuh u Bah Thongni u la ong ba kum ki samla bad ka lawei ka shong ha ki samla, kumta kum ki samla ki don ïa ka jingsngew sheptieng ïa ka lawei ka ban wan bad ki don shibun ki jyrwit-jyrwat kiba la ap lypa ïa ka Jaitbynriew.
“Na ka liang jong ngi, ngi ïohi ba ka nongrim kaba ngi don kum ki samla, ka don bad kane ka seng VPP bad u nongïalam jong ka ruh u long u baskhem jingmut, ngi don ka jingkyrmen kaba skhem ha u ba un leh eiei na ka bynta ka Ri bad ka Jaitbynriew ka jong ngi bad kum ki samla ruh ngi sngewshngaiñ ban ïasnoh lem ha ki tyrpeng jong u bad ngin ïa ïaid ïa ka lynti ban ïashimbynta lem ha ka ban pynpoi sha kata ka thong ïa kaba u don ïa ka jingthmu na ka bynta ka jingbha jong u paidbah paidlang”, la ong u Bah Thongni.
