Shillong, Nohprah 13
Ka tnad pulit pynïaid kali ka nongbah ne ka Shillong Traffic Police (STP) ha ka Sngi Balang ka la pynsniew noh ïa 181 tylli ki tyndong pynmih tdem ba sawa (Modified Silencer) ba la kurup na ki kali bad 2 shaka naduh u Nailar mynta u snem.
Ïa kitei ki tyndong la pynsniew da kaba tylliat da ka ‘Road Roller’ ha Police Reserve, Shillong.
“Ka STP ka trei shitom ban kurup ïa baroh ki tyndong pynmih tdem ba sawa. Mynta u snem ngi la sdang naduh u Kyllalyngkot bad haduh mynta, ngi la lap ïa 320 tylli hynrei ngi la kurup 181 tylli,” la ong u SP ka East Khasi Hills, Bah Sylvester Nongtnger haba kren sha ki lad pathai khubor.
U la ong ruh ba ha shuwa, ha ka por ba la bat nyngkong ïa ki kali bad 2 shaka ba la pyndait ïa kitei ki tyndong, la kyntu ïa ki trai ban weng noh ïa kitei ki tiar (ba la pyndait), hynrei namarba la shem biang ba ki don katto-katne napdeng kitei kiba la shah bat kiba dang pyndonkam ïa kitei ki tiar, kumta ka tnad ka la kurup noh ïa kitei ki 181 tylli ki tyndong.
U Bah Nongtnger u la ong ruh ba STP kan ïai bteng ban peitngor ïa baroh ki kali bad 2 shaka ba la pyndait ïa ki tyndong pynmih tdem ba sawa ki bym ïoh jingbit da ka aiñ.
“Ha une u snem, ka pisa ba la ïoh lum na ka jingdaiñ kuna na baroh ki tyndong pynmih tdem ba sawa ka long T.12,46,500, bad ïa kane la thep sha ka pla tyngka ka Sorkar,” la ong u SP.
Haba kdew ba kitei ki tyndong ba la ïoh kurup ki kynthup ïa kito jong ki 2 bad 4 shaka, u la ong ba kiba bun na kitei ki dei jong ki 2 shaka.
Na ka liang SP u la ban jur ruh ba kito kiba pyndonkam kali ne 2 shaka kim dei satia ban pynkylla dur eiei ïa ki kali ne 2 shaka jong ki, bad ban ieh beit kumba wan na kompeni.
Haba kylli, u DSP Traffic Shillong, Bah M. Marngar u la ong ba man la i jingpynkylla, ka jingdaiñ kuna ka long T.5000 katkum ka kyndon jong ka Motor Vehicle Act.
Ha kawei ka liang, u SP (City), Bah Vivek Syiem u la ong ba ka la don ka jingpynsngew na kiba bun balang halor ka jingpynthut jong kitei ki jait tyndong ïa ka imlang-sahlang namar ka jingsawa khamtam ha ka por mynmiet.
U la bynrap ba katei ka pynthut shi kat dei ïa ki khynnah ba khreh kot mynmiet kumjuh ïa ki ‘riew rangbah bad ki briew ki duh thiah duh dem.
Shuh shuh haba ïadei bad ki dukan kiba die ïa kitei ki jait tyndong, u la ong, “Ngi la shimkhia ïa kane bad ka la don lypa ka hukum na ka ophis Deputy Commissioner ba ma ki ruh kin hap shim ka jingkitkhieh. Ngi la pynsngew sha ki ba ki dei ban sangeh ha kaba die ïa kine ki jait tyndong nalor kiwei-kiwei ki tiar kiba la khang da ka MV Act. Lada ki ïai bteng ban die, ngin hap pynshitom katkum ka aiñ.”
U Bah Syiem u la aikhublei ruh ïa ki paidbah kiba ju ïarap bad kyrshan ïa ka tnad na ka por sha ka por ban pyntip lada don kino-kino ki jingpynkheiñ kyndon kiba kum kitei.
