Shillong, Nohprah 14
Ka jylla Meghalaya ka la ïoh ïa ka kyrdan ba-ar ne ka second prize ha ka State Energy Efficiency Performance Award (Group 4) jong ka National Energy Conservation Awards (NECA), 2023 kaba long ruh kum ka jingithuh ïa ka jingtrei ba kot palat ïa kaba khmih lynti ha ka State Energy Efficiency Index.
Ka Meghalaya ka la ïoh ïa kane ka khusnam ha ka jingïalang sam khusnam kaba la long ha Vigyan Bhawan, New Delhi, ha kaba ka President jong ka Ri India ka Droupadi Murmu ka la ïadon lang kum ka kongsan. Kane ka jingïoh khusnam ka pyni ïa ka jingtreikam ba aiti lut jong ka Sorkar ha kaban tyngkai ïa ka bording bad ba nang pyndonkam bha.
Ka NECA kaba ju pynlong manla u snem ban rakhe ïa ka “National Energy Conservation Day”, ka ai jingithuh ïa ka jingtrei ha kaban tyngkai ïa ka bording kaba long ha ki kam bapher bapher jong ka ïoh ka kot.
Ka National Energy Conservation Day bad ka jingai khusnam ka dei kaba la pynlong da ka Bureau of Energy Efficiency (BEE) hapoh ka Ministry of Power, ka Sorkar India, kaba la pynkupbor katkum ka Energy Conservation Act, 2001, ban teh kyndon bad pynshlur ïa ka jingtyngkai ïa ka bording ha India.
Haba pynpaw ïa ka jingkmen, u Myntri ka tnat Bording ka Jylla u Abu Taher Mondal u la ong, “Ka State Energy Efficiency Performance Award ka phalang ïa ka jingkut jingmut jong ngi halor ka jingtyngkai ïa ka bording bad ka ai mynsiem ïa ngi ban ïaid ha ka lynti ban lah pynmih ïa ka bording kaba khuid hadien habud”.
U Mondal u la ong ba ka Meghalaya ka la lamkhmat ha ka jingpyrshang ban pynmih ïa ka bording kaba lah ban neh slem bad dang shen ka Jylla ka la pyllait ïa ka Solar Mission ba T.500 klur ban pynthikna ïa ka jingpynmih bording na ka thymmei kaba neh shirta hapoh ka Jylla.
La pyntip ruh ba ka Jylla ka la pynkhreh ban shna ïa artylli ki solar park ha artylli ki jaka kiba lah ban pynmih bording ba mar 20MW. Kine ki dei ha Suchen bad ha Thamar.
