Shillong, Nohprah 14
U Myntri Rangbahduh ka Ri u Narendra Modi u la kular ban ai ka jingkyrshan ïa ka Sorkar Meghalaya ba kan lah ban kynjoh sha ka thong kaba ka la angnud bad kumjuh ha ka jingpynkynriah ïa ki shlem treikam bad ka Secretariat sha ka New Shillong Township ha kine ki san snem ban wan.
Ïa kane la pyntip da u Myntri Rangbah ka jylla u Conrad K Sangma ha ka Sngi Palei hadien ba u la dep ban ïakynduh ïa u Modi ha New Delhi. Nalor nangta u la ïathuh ruh ba ha kane ka jingïalang u la ïoh ban pynsngew halor ki kam pynroi kaba bniah bha bad ka jingïaid jong ki prokram bapher bapher ka Sorkar ha Jylla.
“Ha kane ka jingïakynduh ïa u Modi, nga la aiti ïa ka kaiphod kaba bniah bad nga la ai ka jingbatai ha u bad u la kmen shi kat dei ban ïohi ïa ki kam bapher bapher kiba la mih hapoh ka Jylla bad u la kmen ruh ban ïohi ba ka mang tyngka sha ka roi ka par jong ka Jylla ha kine ki san snem ka la kiew da palat arshah, kaba la jan kynjoh ïa ka lai shah na kaba ju long ha ki 5-6 snem mynshuwa,” la ong u Conrad.
Shuh shuh u Conrad u la pyntip ba ha kane ka jingïakynduh ïa u Modi, u la kyntu ba un tuklar bad kyrshan ïa ka Meghalaya ban pyni lynti lem bad ai jingkyrshan ban lah kynjoh sha ki thong kiba la buh na ka bynta ki san snem ban wan.
“Nga la ïathuh ruh ha u, ïa ka jingthmu ban don ïa ka New Shillong Township, ha kaba ngi la plan ban buh buh noh ïa ka Administrative City bathymmai bad ka Secretariat bathymmai bad ha kaba nga la ïoh ban wanrah hakhmat jong u ruh ïa ki plan bad ki jingpynwan dur haba pan ïa ka jingkyrshan jong u ban pynthikna ba ka projek kan ïaid shakhmat. U la kmen bha ban ïohi ïa kine ki kam pynroi bad u la kular ban ai ka jingkyrshan kat kaba lah na ka liang jong u,” u la bynrap.
U Conrad u la pyntip ruh ba ha kane ka sngi, u la ïoh ruh ban ïakynduh ïa ka Myntri ka tnat Pla Tyngka ka Sorkar Kmie ka Nirmala Sitharaman, ha kaba la kyrpad ïa ka ban pynkiew noh ïa ka bhah bad nang ai shuh shuh ïa ki Externally Aided Project (EAP) sha ka Meghalaya da kaba peit halor ka jinglah ka jong ka.
“Nga la ïoh biang ban batai ïa ka halor ki projek bapher bapher kiba la ïaid mynta lyngba ka Capital Investment Fund (CIF) ba ka Sorkar India ka la ai sha ki Jylla bad lyngba ki EAP ba ngi pyntrei bad ruh ki kam pynroi bapher bapher kiba ïaid ha Jylla,” la ong u Myntri Rangbah ka jylla.
U la pyntip ba ka Myntri ka la ai ka jubab kaba sngewtynnad bad ka la kular ba kan ïarap bad kyrshan nalor ban ai ka jingmynjur ban pynkiew ïa ka bhah jong ka EAP.
