Shillong, Nohprah 14
Ka seng BJP ha Meghalaya ha ka Sngi Palei ka la kynthoh ba naduh ki nongïaidkai step haduh ki khynnah skul bad kiba la leit trei leit ktah bad leit ïew leit hat, bad mano-mano kiba ïaid ha ki surok ha sor Shillong, ki mad beit ïa ka jingeh namar ka jingsniew palat ki surok.
Ha u kyrwoh khubor, u Vice President ka BJP Meghalaya, u Bah Wankitbok Pohshna, u la ong ba kum ban shu kdew, jan baroh ki surok ka sor Shillong bad khamtam eh ki surok ha ka thaiñ Nongthymmai, Garikhana, Demseiñïong ki la nang sniew na ka jingtih ka bym i kut shuh kaba la pynthut ïa ka leit ka wan jong ki paidbah haduh ba ka la pynlong ïa ka tnad pynïaid kali ban pyndap hi dalade ïa ki thliew kumba la paw ha ki lad pathai khubor khamtam kum ha kane ka por Khristmas kaba dei kawei na ki aïom bakhraw na ka bynta ki khun Khristan ha kylleng ka pyrthei bad kumjuh ha kane ka jylla.
Da kaba shimkhia ïa kane, u Bah Wankitbok u la kyrpad ïa ka sorkar jylla ba ka dei ban shimkhia mardor ban pyllait ïa ki paidbah na ki jingeh namar ka jingsniew palat ki surok ha ki shnong ki thaw khnang ba ka jinglehkmen Khristmas kan long kaba shongkun ym tang ban shu ïa khuslai na ka jingbymbiang ki surok.
“Ngi sngewthuh ba kam long kaba suk ban khanglad ïa ka jingsniew ki surok ki lynti syngkien namar ka jylla Meghalaya ka ïoh ïa u slap ba bun tam ha ka shisnem. Hynrei lada mon hi ka sorkar ka lah ban shimkhia ban saiñdur janai ïa ka rukom shna surok bad ha kano ka rukom yn lah ban lait na ka jingjot khari-khari,” u la ong.
U Bah Wankitbok u la ong ba BJP ka sngewdei ba ka sorkar jylla ka hap pynbiang noh da ka kynja song pisa ba la mang lypa ban pynlut mar-mar ban maramot ïa ki surok man ka por haba don ka jingjulor la ka dei kaba rit ne kaba heh.
Ka long kaba sngewlyngngoh haduh katta-katta ba kat haduh mynta khamtam hadien ka jingdon jong ki kor ki bor ba thymmai, ka tnad ba dei peit ïa ki surok kam pat don ïa ka rukom treikam kaba janai ban khmih bniah ïa kum kine ki jingjia khamtam ban lait na ka jingjlan ban ïoh jingmynjur na ka sorkar ban maramot ïa ki jingjulor kiba rit, namar lada shu ieh ïa ki jingjot jingpei barit, ka lam pynban sha jinglut bun shah lada leh bym suitniew naduh ba sdang, la ong u Bah Wankitbok.
“Kum kawei na ka seng kaba long dkhot ha ka sorkar MDA, ka BJP Meghalaya ka long barabor kaba kloi ban ïatreilang bad baroh ki seng kiba sngewïahap jingmut khnang ba ka jylla kan nang kiew nang bha ha baroh ki liang. Namar tang da ka jingïatreilang, ngin sa lah ban pyntikna ba kin nym don shuh ki thliew ha ki surok nangne shakhmat bad ka leit ka wan ki paidbah kan aram khamtam lei kum ha kane ka por aïom Khristmas,” la bynrap u Vice-President ka seng.
