Shillong, Nohprah 14
U nongaibuit jong u Myntri Rangbah ka jylla u Bah Hamlet Dohling u la kular ban ïakren ïa u Conrad K Sangma uba dei u Myntri Rangbah ka jylla ba un mang pisa kyrpang haba don ba pynlong ïa ki prokram ban kyntiew ïa ka sap jong ki hep barit bad samla.
Ïa kine ki kyntien u la pynpaw haba u ai jingkren kum u kongsan ha phainal Ri Bhoi Super Star kaba la long mynta ka sngi ha Umsning kaba la pynïaid da ka LS Syiemlieh Production ha ka jingïatreilang bad ka NPYF Meghalaya Unit.
Ha kane ka sngi la ïadonlang u Bah Kitborlang Nongrem u President ka NPYF kum u symbud kongsan, ki MDC kiba kynthup ïa ka Kong Macdalyn Mawlong, Bah Victor Ranee, Bah Bajop Pyngrope bad u MLA barim ka Umsning Bah Jason Sawkmie.
Ki nongïashimbynta kiba poi phainal kiba dei tang na ka thaiñ Ri Bhoi ki long haduh 20 ngut.
Haba ai jingkren ha kane ka jingïalang u Bah Hamlet Dohling u la ong ba ka NPP kan kyrshan beit ïa ki samla kiba donsap ban pynlong ïa ki prokram ban tei ïa ka imlang ka sahlang hynrei kan nym ïatreilang lada don ki samla kiba pynsniewdur ïa ka imlang ka sahlang.
Nalor nangta u la ong ba kane ka rynsan ïakob ka dei ka lad ban plie ïa ki samla kiba nang ban shad bad rwai.
