Shillong, Nohprah 14
Ka North Eastern Indira Gandhi Regional Institute of Health & Medical Sciences (NEIGRIHMS) ha ka Sngi Palei ka la ïoh ban plie paidbah noh ïa ka Catheterization Laboratory ne ka jingbuh ïa ki tiar thymmai, ka ban lah sumar pat ïa kiba pang klongsnam.
Ïa kane ka Catheterization Laboratory la plie da u Director ka NEIGRIHMS u Prof. (Dr.) Nalin Mehta lyngba ka jingkyrshan da ka tnat ka koit ka khiah ka Sorkar Pdeng. Ha kane ka sngi la don lang u Prof Animesh Mishra, HoD Cardiology, u Prof Manish Kapoor bad Dr Amit Malviya lem bad ki para nongtrei jong katei ka jaka sumar.
Ka Cathlab Laboratory ka ai ka jingmyntoi ban leh 3D Electrophysiological Mapping na ka bynta ban lap bniah halor ka jinglong jingman u klongsnam ha shuwa ban ai jingsumar.
Ka tnat Cardiology lyngba ka jingkyrshan u Director NEIGRIHMS ka la ïaleh katba lah ban wanrah ki lad jingsuk ïa ki nongpang ban ïoh ki lad jingsumar ha ka dor kaba biang.
Ha ka Catheterization Laboratory don ka Optical Coherence Tomography, IVUS, FFR, Rotablation na ka bynta ban eksamin bha ïa u klongsnam khnang ba ki doktor kin tip bniah kumno ban sdang ïa ki jingsumar.
