Mawkyrwat, Nohprah:
U MLA ka Mawkyrwat u Bah Renikton Lyngdoh Tongkhar ha ka Sngi Balang ha ryngkat ka jingdon lang u Bah I Lawriniang, BDO Mawkyrwat Block, u la plie paidbah ïa kawei ka jaka jngohkai pyrthei kaba itynnad kaba tip kum ka Urnar Viewpoint kaba don ha ka shnong Mawrap, South West Khasi Hills District.
Ïa kane ka jaka jngohkai Urnar View Point kaba la pynïaid da ka Sharailang Co-operative Society la ïoh ban shna bad pynitynnad shuh shuh naduh ki jaka peitkai ki lynti bad kiwei kiwei lyngba ka skhim Chief Minister Special Development Fund 2019-20 ha ka jinglut kaba T.2.50,000 hajar lem bad ka skhim MGNREGS ha ka jinglut kaba T.9 lak tam.
U Bah Renikton haba ai jingkren ha kane ka sngi u la pynpaw ïa ka jingsngewkmen ban ïohi ïa ka jingjop wat hapdeng ka jingpyrshang kaba rit eh ka jong u, hynrei ha kane ka sngi la lah ban plie paidbah ïa ka.
U la ïathuh ba ha u snem 2019-20 u la ïoh ban wan peit nyngkong eh ïa kane ka jaka kaba dang don tang da ka khlaw bad ban ïohi ïa katei ka kshaid kaba itynnad u la shu hap ban kiew ha ki dieng.
Nalor kane u la ïathuh ruh ba ka jingitynnad katei ka kshaid kaba u la ïoh ban leit haduh hajan ka la pynlong ïa u ban kut jingmut ban pyrshang leh eiei. Kumta ha ka jingsdang barit u la ïoh ban pynkdew lynti ban shna ïa kane view point lyngba ka skhim CMSDF kaba dei hapoh jong ka MLA skhim.
U la pynpaw ruh ïa jingkhublei ïa ka ophis u BDO Mawkyrwat Block kyrpang eh ïa ki nongpynïaid shnong, ki nongshong shnong kiba don ïa ka mynsiem ïatreilang ban pynbha shuh shuh ïa kane ka jaka jngohkai lyngba ka skhim MGNREGS.
U Bah Renikton u khmih lynti ba kane ka jaka jngohkai kaba la ïoh ban plie kan nym kut noh kumto, hynrei u kyrmen skhem ba kin sa don ki nongjngohkai pyrthei na kylleng ki jaka ki ban poi sha kane ka jaka.
Shuh shuh u la pynpaw ruh ïa ka jingangnud ban don ki lynti ïaid kjat ha baroh ki kshaid kiba don hapoh kane ka distrik. Namar kata, u kyrmen skhem ruh ba lyngba ki jingtyrwa kiba u la phah sha ka sorkar bad lyngba ka jingbuddien jong u, ha kawei kin sa don ki lynti ïaid kjat kiba bha ha kaba ki nongwan jngohkai pyrthei kin ïoh ban ïaid haduh hajan ban ïohi ïa ka jingitynnad jong ki.
