Jowai, Nohprah:
U Myntri ka tnat pule puthi ka sorkar Jylla u Rakkam A Sangma ha ka 13 tarik Nohprah u la wan ban khylliap lama noh ïa ka sngi pynkut jong ka jinglehkmen Silver Jubilee ne ka jingdap 25 snem ka jingïaid lynti ka Kymprup Higher Secondary School Sahsniang-A naduh ba la seng ha ka 26 tarik Rymphang 1998.
Nalor u Myntri u Rakkam A Sangma uba long kum kongsan jong kane ka sngi, la donlang ruh ki MDC ka JHADC kiba kynthup ïa u MDC ka Sohmynting u Lakhon Dkhar kum u symbud kongsan, u WG Sungoh bad u Habahun Dkhar.
Ïa ka jingïalang la pynïaid da u Founder Syngkon bad la ïoh ka jingkren na u Principal ka skul u H Kamar bad na u Waheh Shnong D Ymbon ha ka jingdonlang ki nongshong shnong kynthup naduh ki longkmie longkpa, ki nonghikai bad ki khynnah skul.
U Rakkam A Sangma ha ka jingkren u la ai ka jingïaroh ïa ki bor pynïaid skul, ki nonghikai kiba la len lade ban pynheh pynsan ïa kane ka skul kumba ka long mynta ban pynphriang ïa ka jingnang jingstad sha ki khynnah jong kane ka thaiñ.
Kam long kaba suk ban pyntyllun ïa ka shlem pule haduh 25 tylli ki snem lada ki bor pynïaid skul, ki nonghikai kim trei shitom bad len lade, hynrei dei namar ka mynsiem kaba rhem ha ki ban pynphriang ïa ka jingnang jingstad, kane ka skul ka roi bad ka san kumba ka long mynta, u la bynrap.
U la ai ruh ka jingkyrkhu kyrdoh ba kane ka skul kan dangkiew shaphrang ha baroh ki liang bad ba kan dang lah ruh ban pynmih shibun ki khynnah ki ban long ki riew khraw pyrkhat bad ki samla kiba don ka thong ha ka jingim.
Ha kaba ïadei bad ka mat jingdawa ban pynrung ïa ka skul ha ka Adhoc Grant na ka liang u Myntri u la bthah ïa ki bor pynïaid skul ban pynbiang ïa ki kot ki sla kiba donkam.
Shwa kane, u Chairman u Founder Sungoh ha ka jingkren maitphang, u la ïathuh ba kumno la sdang ïa kane ka skul bad ki jingeh ba bun ba ki mad ha ka jingïaid lynti kaba 25 tylli ki snem ha kaba ki dkhot ka SMC ryngkat ka Dorbar Shnong ki ïaid ryngkat bad ki la jop ruh ïa shibun ki diengpyngkiang bad ki jingeh kiba mih na ka por sha ka por ban pynurlong bad pynjanai ïa ka jingangnud bad ka thong ba la ïohi jngai da ki ‘riew pyrkhat ‘riew ïohi jngai jong ka shnong.
Ha kane ka sngi pynkut ïa ka jingrakhe dap 25 snem, ki bor pynïaid skul kila ïoh ruh ban pynlait ïa ka Souvenir jong ka skul ban pynkynmaw ïa ka jingïaid lynti ba 25 snem ïa kaba la pynlait paidbah ïa ka da u Myntri.
Haba phai khyndiat halor ka jingiaid lynti bad ka history jong ka skul, la ong ba shwa ka 1998 la don tang kawei ka skul ha ka shnong Sahsniang A kaba dei ka Govt. LP School kaba ai jinghikai haduh Class-IV. Ki khynnah skul ki ïai pass man u snem na kane ka skul tangba bun na ki, kim lah ban bteng shuh ïa ki jingpule namar ba kim kot bor ban leit sha kiwei pat ki shnong ne sha sor.
Ki nongïalam jong ka Dorbar Shnong ki ïohi ïa ka jingeh jong ki khun ka shnong bad ki sngewthuh bha ba ka por ka la dawa ba ki khun jong ka shnong bad ki para marjan shnong ki la dei ban ïoh ïa ka jinghikai ha klas ba kham shalor.
Kumta ka Dorbar Shnong ka la mynjur ban seng ïa ka skul kaba yn tip ruh kum ka Kymprup Upper Primary School Sahsniang A’ ha ka snem 1998 bad la pynlong skul ha ïing barit jong ka Balang Presbyterian Sahsniang bad hadien ka skul ka la ïoh la ka jong ka ïingskul ha syndah bad ka skuk kaba mynta.
Ha kaba sdang la buh shwa tang ïa ka Class V bad la don 6 ngut ki khynnah bad la kyntiew pat ïa ki Class man u snem haduh Class VII ha u 2000. Katba nangïaid ki por ki khynnah kane ka skul ki la nangbun, kumta ha u snem 2008 ka Dorbar Shnong ryngkat ka jingiatreilang jong ka SMC ki la ioh ban kyntiew kyrdan ïa ka Upper Primary shaka Secondary bad ha u snem 2019 la kyntiew kyrdan ïa ka Higher Secondary School kaba tip kum ka Kymprup Higher Secondary School Sahsniang A.
Kumba long mynta ka jingdon jong ki khynnah haka Upper Primary Section ki long 140 ngut ha ka Secondary 108 ngut bad ha ka Higher Secondary ki long 28 ngut katba ki nonghikai ki long 14 ngut bad uwei u non Teaching Staff.
La pynphuh pynphieng ïa kane ka sngi da ki jingrwai jingshad ba la shim bynta da ki khynnah kane ka skul.
