Shillong, Nohprah 14
U Myntri ka koit ka khiah ka Sorkar Pdeng, u Dr. Mansukh Mandaviya u la pyntip ba ka don ka lad ban pynkiew ïa ka North Eastern Indira Gandhi Regional Institute of Health and Medical Sciences (NEIGRIHMS) sha kyrdan ‘Institute of National Importance’.
Une u Myntri ka Sorkar Pdeng u la pyntip ïa kane ha ka jubab kaba dang shen kaba u la phah sha u Myntri ka Sorkar Jylla, u Bah A L Hek hadien ba u Bah Hek u la phah jingthoh sha u Dr Mansukh Mandaviya ban kyrpad ïa ka Sorkar Pdeng ban kyntiew ïa ka NEIGRIHMS, Shillong sha ka kyrdan kum ka AIIMS na ka bynta ka jingmyntoi ki paidbah ka Jylla Meghalaya.
U Dr Mansukh u la ong ba kumba ka long mynta, ym pat don kano-kano ka jingtyrwa ka ban sa pdiang na ka bynta ban kyntiew ïa ka NEIGRIHMS, Shillong sha ka kyrdan kum ka AIIMS, hynrei ka don ka jingtyrwa na ka bynta ban pynbna ïa ka NEIGRIHMS kum ka INI (Institute of National Importance) bad ïa kane yn sa pdiang da ka tnat ka koit ka khiah ka Sorkar Pdeng.
Ka NEIGRIHMS Shillong ka dei ka jaka sumar kaba la bei tyngka da ka Sorkar Pdeng bad ka dei ruh ka jaka pule haba ïadei bad ki lad jingsumar khamtam eh ban pynmih ïa ki doktor ki ban ai jingshakri ha ki jaka sumar.
Ka Institute of National Importance (INI) ka dei ka kyrdan kaba pynkup ha kano-kano ka jaka pule bad kaba don ruh ka bynta kaba khraw ban pynmih ïa ki briew kiba tbit ha ki bynta bapher bapher ha kano-kano ka thaiñ ne ka ri.
Kano-kano ka jaka pule kaba ïoh ïa ka kyrdan ‘Institute of National Importance’ ka ju ïoh jingithuh kaba kyrpang bad don ruh ka bor kaba kham heh bad laitluid nalor ka jingïoh ïa ka jingbei pisa na ka Sorkar Pdeng.
Kum ban pynkynmaw, u Bah Hek uba dei u Myntri Sorkar uba peit ïa ka tnat ri jingri ha Jylla, u la thoh shithi ha ka 18 tarik Risaw, 2023 bad phah sha u Dr Mansukh Mandaviya haba ïadei bad ka jingdonkam ban kyntiew ïa ka NEIGRIHMS sha ka kyrdan kum ka AIIMS khamtam namarba ka Sorkar Pdeng ka don jingthmu ban tei ïa ki jaka sumar kum ka AIIMS ha man la ki Jylla hapoh ka skhim Pradhan Mantri Swasthya Suraksha Yojana (PMSSY).
U la ong ba u Myntri Rangbahduh u Narendra Modi ruh u ju don ka jingphai khmat sha kane ka thaiñ Shatei Lam Mihngi bad don jingangnud ban biang ki lad jingsumar kiba ai jingmyntoi shisha ïa ki paidbah ka thaiñ Shatei Lam Mihngi bad Jylla Meghalaya.
Kumta u la ong ba ban pynurlong ïa ka jingïohi bad jingangnud u Modi, ka Sorkar Pdeng ruh ka la phaikhmat sha man la ki Jylla ban don ki jaka sumar kum ka AIIMS bad sngewdei ban shim ïa ka NEIGRIHMS Shillong kum kawei na ki jaka sumar ban kyntiew sha ka kyrdan kum ka AIIMS na ka bynta ka jingmyntoi ki paidbah.
