Shillong, Nohprah 14
Ka District Magistrate ka East Khasi Hills ha ka Sngi Palei ka la mana ïa kino-kino ki briew ne kynhun ban dawa ne leit khrong pisa be-aiñ na ki trai dukan bad la maham ruh ban kem naphang lada lap ïa kiba donkti.
Ha ka hukum, ka Kong Rosetta Mary Kurbah, IAS, District Magistrate ka East Khasi Hills, ka la pyntip ba ki la don ki jingujor halor ka jinglum pisa na ki trai dukan bad kiwei ki shlem kiba don bynta ha ki kam khaïi pateng ha ka kyrteng jong ka jingpan jingïarap pisa ne ka jingai da ki shithi dawa pisa, bad kane ka la buh jingeh ïa ki trai dukan bad ha kajuh ka por ka la wanrah ïa ka jingsngew syier.
Ka Kong Kurbah ka la ong ba kino-kino ki jinglum pisa ha baroh kawei ka East Khasi Hills kiba khlem da ïoh jingbit lypa na ka shlem treikam jong ka Deputy Commissioner, East Khasi Hills lane da kiwei pat ki bor sorkar, ki long kiba be-aiñ. Ka la pynshai ruh ba kano-kano ka jinglum pisa ba la ai jingbit da ka Deputy Commissioner ne kiwei pat ki bor ba dei khmih ki long tang na ka bynta katto-katne por bad na ka bynta ki katto-katne ki jingthmu kiba shai.
Ha kajuh ka por, ka Deputy Commissioner ka la bthah ïa baroh ki dukan ba kin buh da ki CCTV ha ki shlem jong ki ha ki jaka kiba biang khnang ba kan don jingshngaiñ bad ban lap ruh lada don kino-kino ki jingleh be-aiñ.
Ka Deputy Commissioner ka la pynmih da ka hukum hapoh ka kyndon 144 Cr. PC ha kaba la khang pyrshah ïa ka jingdawa pisa na ki dukan ne kiwei pat ki shlem kiba don bynta ha ki kam khaïi pateng. Lada lap ïa kiba donkti, ka Kong Kurbah ka la ong ba yn kem bad pynshitom ïa ki katkum ki kyndon aiñ.
Kane ka hukum ka la treikam naduh ka 13 tarik Nohprah tat haduh ban da pynbna da kumwei pat.
