Nongpoh, Nohprah 14
U President ka Petroleum Dealers Association of Meghalaya (PDAM) u Bah Kennedy Khyriem u la kynthoh jur ïa kito ki briew kiba donkti ban tuh umphniang ha shilynter ka surok bah National Highway 6 naduh Jorabat ter ter da kaba ong ba kine briew ki ñiah ïa ki kali ba remdor, ki bam ha ki hotel kiba rem da ka umsyep bad ka hok jong kiwei.
Ïa kane u Bah Kennedy Khyriem u la kren hadien ka jingïalang kaba la khot pynlong da ka sorkar jylla lem bad ki nongïalam ka North East Petroleum Mazdoor Union (NEPMU) kaba la pynlong ha ka Sngi Palei ha Circuit House Nongpoh.
U Bah Kennedy u la pyntip ruh ba ka jingïaid jong ki kali kit umphniang lyngba ka surok bah National Highway 6 kam duna ïa ka 400 tylli ha ka shi sngi, kata kynthup ïa kiba wan pynpoi umphniang ha ka jylla Meghalaya, kiba leit sha Silchar, Badarpur, Hailakandi, Karimganj, Tripura, Mizoram bad ruh sha Manipur lada ka surok nangtei kam lait, ki hap ban ïaid lyngba ka jylla Meghalaya.
Haba pynshai halor ka jingduhnong katei ka kam tuh umphniang, u Bah Kennedy u la ïathuh ba lada na kitei 400 tylli ki trok kit umphniang, shu shim noh kiba tuh ki don kumba 300 tylli, bad ka jingtuh umphniang ka long haduh kumba 60 litar haduh 200 litar na kawei ka trok. Lada kheiñ duna eh ïa ka jingshah tuh umphniang, kata 100 litar na kawei ka trok ruh, kan long kumba 10 hajar litar shisngi bad lada kheiñ tang 300 sngi na ka 365 sngi ha ka shisnem ruh, ka jingduhnong jong ki trai petrol pump kan nym duna ïa ka T.27 klur ha ka shisnem, kata lada kheiñ kyllum ïa ka dor jong ka Petrol bad Diesel ha ka dor T.90 shi litar (Petrol T.98/- shi litar bad Diesel T. 87/- shi litar), ïa kaba u la ong ruh kum kata ka ‘Multi Crore Racket’ ha ka ktien phareng.
Halor kane ka bynta, na ka liang u Bah Kennedy u la ïathuh ba kane ka kam tuh kam thiem ka dei kaba la ïaid mynta la bun bun snem bad kum ki trai petrol pump kim lah shuh ban shu peit sah bad mynta ka kynti ki la shim ïa ka rai kaba tyngeh ban ïakhun haduh kaba kut ban pynduh ïa kine ki kam tuh kam thiem ha kaba u la kyntu ruh ïa ki shnong ki thaw, ki seng trei mon sngewbha ba kim dei ban ailad ïa kine ki kam sniew ba kin kharoi hapoh ka jylla.
