Shillong, Nohprah:
U MLA ka South Shillong u Bah Sanbor Shullai uba long ruh u Chairman ka Monitoring Cum Implementation Committee ka 19th South Shillong Constituency, ha ka Sngi Saitjaiñ jong ka taïew ba la dep, u la pynlong ïa ka Pre Christmas bad New Year Get-Together ha kaba u la ai jingïarap T.3.50 lak sha ki 14 tylli ki Balang Khristan na ka bynta ban ïoh pynkhreh ïa ka jingrakhe Khristmas.
U Bah Sanbor u la ai ïa katei ka song tyngka sha ki 14 tylli ki Church Committee kiba kynthup ïa ki Balang Khristan ki Khasi, Jaiñtia, Garo bad ki bym dei riewlum kiba hap hapoh jong ka South Shillong Constituency, lyngba ka Discretionary Grant jong u snem 2023, khnang ba kin ïoh ban pynkhreh ïa ka Khristmas & Snem Thymmai ha ki Balang ki jongki bad la ki riewngeit.
Kum u MLA, u Bah Sanbor u la kyntu ruh ïa ki nongïalam Balang ba kin ïaleh ban pyndonbynta lang ïa ki heprit khamtam eh ïa kito kiba wan na ki longïing baduk ba kin rakhe ïa ka Christmas bad Snem Thymmai.
U Bah Sanbor u la pynbna ba yn pynlong ïa kane ka jingrakhe ryngkat bad ka jingsam ïa ka jingïarap manla u snem bad baroh ki Balang Khristan kiba don hapoh ka Constituency.
Hadien ba la dep ban sam ïa katei ka jingïarap la pynlong ïa ka jingot ïa u cake Khristmas bad ka jingdih sha bad la pynkut ïa ka prokram da ka jingbuh jingduwai na u Pastor Rev Sadhu Sundar Singh jong ka North India Christian Church.
