Nongpoh, Nohprah 14
Ki nongïalam jong ka North East Petroleum Mazdoor Union (NEPMU) ha ka Sngi Palei ki la rai ban pynkut noh ïa ka jingsangeh kit umphniang bad ban bteng biang ïa ka jingpynpoi umphniang sha ka jylla Meghalaya.
Kane ka rai jong ka Union ka la wan hadien ka jingïalang kaba la pynlong ha kane ka sngi ha Circuit House Nongpoh bad ka Sorkar Jylla kaba la lamkhmat da u Additional Deputy Commissioner ka East Khasi Hills District, u Bah Peter Passah, u Additional Deputy Commissioner ka Ri Bhoi District, u Bah MB Tongper, ki nongïalam ka Petroleum Dealers Association of Meghalaya, ki nongmihkhmat na ka IOCL bad kiwei kiwei kiba ïa don bynta ha kane ka kam.
Haba kren sha ki lad pathai khubor hadien ka jingïalang, u Bah Peter Passah, u la pyntip ba ka jingïakren bad ki nongïalam ka NEPMU ka long kaba sngewtynnad bad hadien ba la ïoh ban ïatai halor ka jingeh jong ki paidbah bad ruh jong ki dkhot ka NEPMU, la ïoh ïa ka jingmih kaba sngewtynnad bad kata ka long ba na ka liang ka NEPMU ka la rai ban pyllait noh ïa ka umphniang hadien ar kynta bakut ka jingïalang.
U Bah Passah u la ïathuh ruh ba na ka liang ka jong ki kum ki bor pynïaid district ki kyrmen skhem ba ha ka janmiet jong ka Sngi Palei, ki trok kiba kit umphniang kin sdang ban thep umphniang ban pynpoi pat sha kylleng ki bynta jong ka jylla.
Ha kaba ïadei bad ka jingdawa jong ka NEPMU ban pyllait ïa ki katto-katne ngut ki nongñiah kali kit umphniang kiba la shah kem noh ha ki pulit ka jylla halor ka jingdonkti ban tuh umphniang, u Bah Peter Passah u la pynshai sha ki nongïalam ka NEPMU ba kane ka kam, kam dei satia hapoh ka jingkhmih jong ka sorkar, hynrei ka dei ka kamram jong ka ïingbishar ban leh ïa kaba donkam khnang ban lap ïa ki jingshisha ïa kiba donkti bad ruh ban rat dyngkhong ïa kum kine ki jait kam.
