Shillong, Nohprah 15
Ki ar tylli ki seng saiñ pyrthei, ka United Democratic Party (UDP) bad ka Hill State People’s Democratic Party (HSP DP) kin sa ïakynduh noh shen ban jied bad rai ïa u kyrtong monlang jong ka Regional Democratic Alliance (RDA) na ka bynta ka ilekshon sha Ïingdorbar Thawaiñ Lok Sabha na Shillong parliamentary konstitwensi ka ban sa long ha u Ïaïong bad Jymmang, 2024.
Ka tyllong khubor ka ïathuh ba ka jingïalang jong ka RDA la pynbeit ba kan long ha ka 19 tarik mynta u Nohprah, bad kane kan dei artad ka jingïalang kaba khatduh eh ban shim rai haba ïadei bad ka jingjied kyrtong ha kaba yn sa pynbna noh syndon ha katei hi ka sngi la baroh ki kam ki ïaid beit.
Ka tyllong khubor na baroh ar tylli ki seng ka ïathuh ba ka kyrteng kaba kham hakhmat eh ban ïakren ka dei ka kyrteng jong u President barim ka Hynñiewtrep Youth Council (HYC), u Bah Robertjune Kharjahrin.
La ong ba baroh ar tylli ki seng kim don kano-kano ka jingwit haba ïadei bad ka kyrteng u Bah Robertjune bad lada ïaid beit ka jingïakren, ka RDA kan sa pynskhem ïa ka kyrteng jong u kum u kyrtong bad pynbna noh syndon ha katei ka sngi.
Kham mynshwa ka HSPDP ka don jingthmu ban tyrwa kyrtong na ka liang jong ka bad ka kwah ban wanrah da kino-kino ki briew ki bym dei ki dkhot jong ka seng bad lada ka RDA ka mynjur, yn phah ïakhun ruh ha ka lama bad ka shap jong ka HSPDP.
Hynrei hadien ba la paw ka kyrteng jong u Bah Robertjune Kharjahrin na ka liang ki nongïalam ka HSPDP ruh kim da don kano-kano ka jingwit wat lada sei ïa u kyrtong monlang jong ka RDA u ban ïakhun ha ka lama bad ka shap jong ka UDP.
Kham mynshwa, ka kyrteng jong u President ka Khasi Authors’ Society (KAS) u Dr DRL Nonglait ruh ka paw ba un long u kyrtong hynrei ma u hi dalade u la weng noh ban don ha ka thup kyrteng jong ka RDA.
Ka tyllong khubor ka ïathuh ba ha ka jingshisha, ka HSPDP ruh ka kwah ban tyrwa ïa ka kyrteng jong u Dr Nonglait.
Kumta ka tyllong khubor ka ïathuh ba kaba shai mynta ka long ba kan suk ïa ka RDA ban shim rai ha kane ka jingïakynduh namar baroh ar tylli ki seng kim don jingwit ïa ka kyrteng u Bah Robertjune Kharjahrin ban long kum u kyrteng ka RDA.
