Sonbhadra (UP), Nohprah 15 (UNI)
Kawei ka ïingbishar ha Sonbhadra distrik ha ka Sngi Thohdieng ka la pynbna ban set patok haduh 25 snem ïa u MLA ka seng Bharatiya Janata Party (BJP) na Duddh konstitwensi, u Ramdular Gond, bad un hap ruh ban siew ïa ka kuna kaba T. 10.10 lak halor ka jingleh be-ijot ïa kawei ka khynnah rit kaba la jia khyndai snem mynshwa.
U muktiar uba dei u Special Public Prosecutor (POCSO), u Satya Prakash Tripathi, u la ong ba u Additional District Judge Ahsanullah Khan ha ka 12 tarik Nohprah u la shem ba u Gond u la donkti ha katei ka kam leh be-ijot, bad naduh kato ka sngi, ki pulit ki la rah noh ïa une u MLA sha patok.
Mynta ka sngi pat, ka ïingbishar ka la pynbna ba u Gond un hap ban shong patok na ka bynta 25 snem bad u hap ruh ban siew ïa ka kuna kaba T. 10.10 lak. Ka ïingbishar ka la hukum ba ïa kane ka kuna yn hap ban siew sha katei ka khynnah.
Nalorkata, ka ïingbishar ka la hukum ba ïa ki snem ba u Gond u dep ban shong patok, yn sa khate noh na katei ka 25 snem.
U Tripathi u la ong ba katei ka jingjia shah leh be-ijot ka la jia ha u Naiwieng 2014 ha ka por ba u Gond um pat long satia u MLA.
“Ha kato ka por, u hynmen jong kata ka khynnah kaba la shah leh be-ijot u la ujor sha ki pulit ka thanat Myorpur ha kaba la kynnoh ba u Gond u la leh be-ijot ïa ka para jong u la palat shi snem hadien ba u la byrngem byrsit ïa ka,” la ong u Tripathi.
Hadien ba la ïoh ïa katei ka jingujor, ki pulit ki la pdiang ïa ka katkum ki kyndon jong ka Indian Penal Code bad ki la ai ruh ïa ka jingmudui sha ka ïingbishar pyrshah ïa u Gond.
