Shillong, Nohprah:
Ka Khasi Students’ Union (KSU) West Jaiñtia Hills District Unit ha ka Sngi Palei ka la dawa na ka Director of Health Services (MI) ban thung noh ïa District Medical Health Officer (DMHO) bapura ha West Jaiñtia Hills District namar haduh mynta ym don DMHO hapoh ka District.
Ha ka kyrwoh khubor ba la pyllait da ka KSU WJHDU la pyntip ba ha ka seng ha katei ka sngi ka la leit ban ïakynduh ïa ka DHS (MI) ban pynsngew ba haduh mynta hapoh ka district ym don satia DMHO bapura hynrei tang u Additional DMHO.
Shuh shuh ka seng ka la pyntip ba kane ka jingdawa ka long halor ba ka seng ka la sakhi ïa ka jingud jingnam jong ki paidbah ka District ïa ka jingeh kaba ki mad na ka jingbym don DMHO ha ka District bad haba ki leit sha katei ka ophis, kam ju seisoh bad kam ju poi shaei-shaei ruh.
“Ka jingbym don DMHO bapura ha ka District ka la pyndkoh shibun ïa ka rukom treikam namar ba une Additional DMHO uba khmih mynta, um don satia ka bor ban shim rai watla ka dei ka kam kaba rit ruh bad ka seng ka lap ba ka don ka jingdkoh ha ka jingtreikam,” la ong ka KSU WJHDU.
Ki la pyntip ba ha ka jingïakren bad ka DHS, ka seng ka la pynbor ban thung noh mardor ïa DMHO bapura khnang ba kan pynsuk ïa u paidbah jong ka thaiñ. Na ka liang ka DHS ka la kular hakhmat jong ki nongïalam ka seng ba katba lah kan shimkhia ban pynsted bad ban leh ïa kaba donkam na ka bynta ban pynsuk ïa u paidbah ka thaiñ.
