New Delhi, Nohprah 15
Ka sorkar u Himanta Biswa Sarma ha Assam kan wanrah da ka aiñ rew ha Ïingdorbar Thawaiñ ha u Rymphang 2024 na ka bynta ban khang shi syndon ïa ka jingïoh bun ngut ki kurim lane ka ‘Polygamy’.
Ïa kane ka aiñ rew la pynbit pynbiang hadien bun bnai jong ki jingïakren bad jingïasyllok bad kiba bun ki ‘riew paidbah bad kumjuh ruh ki kynhun.
Haba kren sha ki lad pathai khubor, u Himanta u la ong, “Ïa kane ka aiñ rew ban khang ïa ka jingïoh bun ngut ki kurim yn sa wanrah ha Ïingdorbar Thawaiñ jong ka jylla Assam. Ka Dorbar jong ka Ïingdorbar Thawaiñ kan sdang naduh ka 4 tarik Rymphang.”
Kham hashwa, u Myntri Rangbah ka Assam u la ong ba kin don ki bynta ha ka aiñ rew ki ban kren bad teh lakam ïa kata ka ‘Love Jihad’ ha ka jylla.
Ki tyllong khubor ki ïathuh ba ka sorkar ka la ïoh pdiang kumba 149 tylli ki jingai jingmut hadien ba ka sorkar ka la pan jingmut na ki paidbah halor katei ka aiñ rew. Na kine, 146 tylli ki dei kiba kyrshan ïa katei ka aiñ rew bad kane ka paw ba kiba bun hi ki ai jingkyrshan. Hynrei ki la don pat lai tylli ki kynhun kiba la pyrshah ïa katei ka aiñ rew.
Ka sorkar ka la thaw ruh da ka kynhun jong ki ‘riewshemphang ban peit la ka Ïingdorbar Thawaiñ ka Assam ka don ne em ka bor ban thaw aiñ halor katei ka bynta.
Kane ka kynhun ka la aiti ïa ka kaiphod sha u Himanta hadien ba ka la ïaphylliew jingmut bad kiba bun ngut ki briew bad kynhun, bad ka la pynskhem ruh ba ka Ïingdorbar Thawaiñ ka don ïa ka bor ban thaw ïa kaba kum katei ka aiñ.
