Shillong, Nohprah 15
Ka jingpyntrei ïa ki saw tylli ki projek kynthup ïa ka Integrated Command and Control Centre (ICCC) ka la ïaid shaid-shaid ha nongbah Shillong bad baroh ki don 17 tylli ki projek kiba hap hapoh ka Smart City.
Kine ki saw tylli ki projek ki long ka Integrated Command and Control Centre (ICCC) bad Smart Elements, ka jingtei kaba lai kyrdan ïa ka jaka ïeng kali ha ki bynta ka nongbah Shillong, ka jingtei ïa ka Commercial Complex ha Polo bad jingtei thymmai ïa ka ïew ha Laitumkhrah.
Kine ki projek ki la kot sha ka T. 212.82 klur ka jingmang pisa.
Dang shen u Symbud Myntri Rangbah uba peit ïa ka tnat pynroi sor u Bah Sniawbhalang Dhar ha ryngkat ki ophisar bad ki kontraktor, u la leit peit ïa ka jingpyntrei ïa bun tylli ki projek hapoh ka Smart City khnang ban ïoh jingtip katno ka jingpyntrei ka la ïaid bad lah ne em ban pyndep katkum ka por ba la buh.
Ki don kumba 17 tylli ki projek kiba la mang lyngba ka Smart City.
La ong ba tang ka ICCC projek, ka jingpyntrei ka la ïaid kumba 75 na ka 100 bad ka por ban pyndep la buh ha ka 31 tarik Lber, 2024.
La ong ba na ka T. 212.82 klur, la pyllait pisa T.139.12 klur sha ka kompani ba pyntrei ka M/S Nice Infotech.
Haba ïadei bad ka jaka ïeng kali kaba don lai kyrdan (retrofitting and upgradation of 3-multilevel parking) ha ki bynta ka nongbah Shillong, ka jingpyntrei ka dang ïaid tang kumba 22 na ka 100 ha kaba la pyllait T. 6.27 klur na ka T.46 klur sha ka kompani Avantika Contractor Limited.
Ka jaka pynïeng kali kan ngiam 252 tylli ki kali, 87 tylli ki bos bad 65 tylli ki trok. Ïa kane ka projek yn pyndep ha ka 31 tarik Lber, 2025.
Haba ïadei bad ka jingpyntrei ïa ka commercial complex ha Polo, ka jingpyntreikam la ïaid kumba 70 na ka 100 bad la pyllait ïa ka pisa kumba T.52.63 klur na ka T.100.33 klur sha u kontraktor/kompani M/s Badri Rai and Company.
Kane ka commercial complex ha Polo kan don 94 tylli ki dukan bad ka jaka ïeng kali kumba 100 tylli. La buh por ban pyndep ha ka 30 tarik Jylliew 2024.
Halor ka ïew ha Laitumkhrah, la pyllait pisa kumba T.20.76 klur na ka T.38.20 klur sha u kontraktor (M/s Collinstar Sawkmie bad ka M/s Shrolenson Marbaniang (JV)).
