Bengaluru, Nohprah 15
Kum shibynta ban kyntiew ïa ka ïoh ka kot jong ki nongrep bad ïa ka jylla Meghalaya hi baroh kawei khamtam ïa u sohniamtra ha ryngkat bad kiwei kiwei ki soh ki pai, ki umsoh, ki musli musla bad kiwei kiwei ki jait jingbam jingdih kiba la wanrah bad pynmih napoh ka jylla Meghalaya, ka sorkar jong ka jylla Meghalaya ka la pynlong ïa ka ïew pyninam ba la tip kum ka Zest Fest Meghalaya Khasi Mandarin kaba la sdang naduh ka Sngi Palei ka 14 tarik u Nohprah mynta u snem bad pynkut haduh ka 17 tarik jong ujuh u bnai.
Ïa katei ka prokram la ïoh ban sakhi ha ka 15 tarik u Nohprah kaba la pynlong ha nongbah Bengaluru ka jylla Karnataka ha phyllaw ka dukan bah ka Lulu Mall, Bangalore. Ha katei ka ïew pyninam la wan ban sakhi da ka Myntri ka tnad ka rep ka riang bad ïa ka bha ka miat jong ki nongrep ka sorkar Meghalaya, ka Dr. Mazel Ampareen Lyngdoh kaba la long kum ka kongsan ha katei ka sngi.
Ha ki sngi kiba bud kata ha ka 16 bad ka 17 tarik u Nohprah 2023, yn don ka jingpyninam ïa ka jingriewspah bad ki jingdon jingem jong ka jylla Meghalaya ka ban long ha Forum Mall, Kanakpura bad ha Lal Bagh Botanical Garden.
Kane kadei ka sien kaba nyngkong ha kaba ki nong Meghalaya ki la ïoh kum kane ka lad ban pyninam ïa ki soh jong ki ha nongbah Bengaluru ha kaba ki paidbah na kylleng ki jylla bad ruh kiba na kiwei pat ki ri jong ka pyrthei, ki la wan ban ïa mad bad ban thied ïa ki soh ki pai bad ki jait jingbam na kitei ki dukan.
Ha kane ka jingpyninam ïa ki mar rep ki la don shibun ngut ki nong Meghalaya kiba la ïashimbynta ban sei ïa ki mar ki mata jong ki ha kane ka tamasa kiba kynthup naduh u sohniamtra, sohtrun, sohmrit, shynrai Lakadong, slasha, umsoh bad kiwei kiwei de ki mar bam bad mar rep kiba la pynmih napoh ka jylla Meghalaya.
Shuh shuh kane ka jingpyninam kam dei tang ban shu pyninam ïa ki mar rep jong ki nong Meghalaya, hynrei kadei ruh shibynta ban burom ïa ka jingtrei shitom jong ki nongrep bad ka jingriewspah.
Haba ïoh ban ïakren bad ki Khasi kiba la wan ban pyninam ïa kine ki mar rep ki la ong ba kane kadei ka sien kaba nyngkong ba kin wan poi shapoh ka nongbah Bengaluru ban pyninam ïa ki mar rep jong ki bad kitei ki mar rep jong ki, ki dei kiba khlem khleh dawai satia bad kiba long shngaiñ ïa ki paidbah ba kin bam.
“Ngi sngewsarong ba ngi wanrah nam ïa ka jylla Meghalaya bad ngi kwah ba ki briew kin tip kham bha ïa ngi shatei ba kaei kaba ngi pynmih kam dei kaba duna hynrei ka long kaba biang”, la ong kitei ki Khasi kiba shongdie ïa kitei ki dukan.
Ki la pynpaw ruh ka jingsngewnguh ïa ka sorkar jylla ba ka la ai ïa kaba kum kane ka lad na ka bynta ban pyninam sha ka pyrthei hi baroh kawei.
Ha kaba ïadei pat bad ka jingwanrah ïa ki sohniamtra napoh ka jylla Meghalaya, kitei ki nongdie dukan bad ki nongrep ki la pynpaw ba ym baroh ki soh ki bha lut haduh ban da poi sha Bengaluru, hynrei ki don bun kiba la pait bad jem, kiba la bam khñiang bad ki bym long shuh wat tang ban bam namar ki lah sniew na ka jingjngai eh ka lynti.
Ki la ong ba ki kwah ban pyni sha ka jylla Bengaluru ba u sohniamtra napoh ka jylla Meghalaya u dei bathiang bad u bym khleh dawai satia.
“Kane kadei ka jingsdang bad ki briew ruh kim pat tip bha ïa kum une u sohniamtra, ka jinglong kyrpang ka jingbang bad ka jingthiang, bad ynda ngi la ïoh biang ïa kum kane ka prokram ngin sa nang pynithuh shuh shuh ïa ki paidbah ha kaba ïadei bad ka dor ruh kumjuh”, ki la bynrap.
Ki la pynpaw ruh ba kim kwah ba katei ka jingpyninam ïa u sohniamtra kan kut tang ha kitei ki sngi hynrei ki kwah ba ka sorkar jylla kan dang ïai pynlong biang ïa kum kine ki jait prokram khnang ba kan long ka jingmyntoi bad ka jingïarap na ka bynta kiwei pat ki mar rep Khasi ba kin kiew bad ban donnam.
“Ngi sngewtynnad bad ngi sngewsarong ba napoh ka jylla Meghalaya ngi la lah ban wanrah ïa u soh hangne hapoh Bengaluru ha kaba ngi pyni ïa ka jingdon jong ngi napoh ka jylla ïa ki soh”, la ong kitei ki nongdie bad ki nongrep.
Shuh shuh kitei ki nongdie ki la kyntu ruh ïa kiwei ki para samla ka thaiñ ba kim dei ban klet bad kynran dien ïa la ka jong ka rep ka riang hynrei kin pynim bad ba kin trei da kaba ki trei shitom lyngba ki tnad bapher bapher ban ïohrah bad pyninam ha ki jaka bapher bapher ïa ki jingpynmih napoh ka jylla Meghalaya.
