Nongpoh, Nohprah 15
Ha kawei ka jingjia tyngkhuh kali ha Jorabat ha ka Sngi Thohdieng, 2 ngut ki samla pule jong ka Don Bosco University, Sonapur ki la duh noh la ka jingim, katba uwei pat u la mynsaw jur hadien ba ka thuk-thuk kaba ki shnong ka la ïatynrah bad kawei ka trok ha jingkieng Jorabat.
Kumba la ïoh lum jingtip, la ïathuh ba katei ka la jia ha ka por 3 baje eiei mynsngi katba kitei 3 ngut ki samla pule ka Don Bosco University kiba la ñiah da ka thuk-thuk kaba don ïa u nombor AS-01-EJ-7870 da ka jingthmu ban leit sha nongbah Guwahati, ynda poi ha jingkieng Jorabat ki la leit ban tynrah ïa kawei ka trok kaba don ïa u nombor NL-01-AE-1887.
Na ka liang ki bor pulit ka Jorabat ki la pynkit noh mar-mar ïa kitei ki 3 ngut ki samla sha Guwahati Medical College & Hospital (GMCH) na ka bynta ban ïoh ka jingsumar kaba kyrkieh.
Hynrei, kaba sngewsih pat ka long ba 2 ngut na kitei ki samla ba kynthup ïa u Kethosetuo M, na ka Jylla Nagaland bad u Shreyan Roy na ka Jylla Assam ki la khlad noh mar sien poi ha katei ka jaka ai jingsumar katba uwei pat uba la tip kyrteng kum u Kethosetuo Kratsutsu na ka Jylla Nagaland uba la mynsaw jur, u dang don hapdeng ka jingshah sumar.
