Bengaluru, Nohprah 15
Ka Dr. Mazel Ampareen Lyngdoh kaba dei ka Myntri ka tnad ka rep ka riang bad ïa ka bha ka miat jong ki nongrep ka sorkar Meghalaya ka la pynpaw ka jingsngewkmen kaba khraw eh ba ki nongrep jong ka jylla Meghalaya kiba la ïoh ban pyninam ïa u sohniamtra bad kumjuh ruh ïa u sohtrun bad kiwei kiwei ki jait jingbam bad ki mar rep ba la shna bad pynmih hi napoh ka jylla Meghalaya hapoh ka nongbah Bengaluru ha ka ïew pyninam ïa kaba la tip kum ka Zest Fest Meghalaya Khasi Mandarin kaba la sdang naduh ka Sngi Palei ka 14 tarik u Nohprah 2023 bad pynkut pat ha ka 17 tarik jong ujuh u bnai.
“Mynta ka janmiet, nga wan kyrpang shaduh sha Bengaluru ha kaba nga la ïalam ïa kine ki nongrep, ki kynhun nongrep, ki kompani ki nongrep, ki Self Help Group (SHG) kiba la ïateh bad ïasoi lang ha ka khaïi ka pateng ba kin ïoh ban wanrah ïa u sohniamtra jong ki sha Bengaluru”, la ong ka Kong Ampareen.
Ïa katei ka prokram pyninam la pynlong ha nongbah Bengaluru ha ka jylla Karnataka ha phyllaw ki dukan bah ka Lulu Mall, Bangalore, Forum Mall, Kanakpura bad ka Lal Bagh Botanical Garden kum shibynta ban kyntiew ïa ka ïoh ka kot jong ki nongrep bad ïa ka jylla Meghalaya hi baroh kawei khamtam ïa u sohniamtra ha ryngkat bad kiwei kiwei ki soh ki pai, ki umsoh, ki musli musla bad kiwei kiwei ki jait jingbam jingdih. Kane kan dei ruh ka sien kaba nyngkong ha kaba ki nong Meghalaya ki la ïoh kum kane ka lad ban pyninam ïa ki soh ha nongbah Bengaluru.
Haba kren sha ki lad pathai khubor ha ka 15 tarik u Nohprah 2023 ha nongbah Bengaluru hadien katei ka prokram, ka Dr. Mazel Ampareen Lyngdoh ka la ong ba ha ki bnai ba la dep, na ka liang jong ka sorkar ka la ïalam ïa ki nongrep sha New Delhi ban pyninam ïa u sohtrun bad kane ka la wanrah nam shikatdei eh ïa ka jingbang jong u sohtrun ba la pynmih napoh ka jylla.
Shuh shuh ka Dr. Ampareen ka la ong ba ha katei ka jaka ïathied ïapet ne ka ‘mall’, na ka liang jong ka sorkar ka la dep ban soi ïa ka soskular ha ki taïew kiba la dep kaba neh haduh arsnem ha kaba ki dukan bapher bapher na ki kynhun baroh na sawdong jong ka jylla kiba treh ban wan bad ïashimbynta, la ai ïa ki ïa ka lad ba kin wan ban die ïa ki mar ki mata jong ki naduh u sohmynken, slasha, shynrai, sohmrit bad kiwei kiwei ki mar bam kiba la shna bad pynmih napoh ka jylla Meghalaya ki la wan pyninam ha katei ka ïew pyninam.
“Mynta kane ka dei kata ka ïew kaba ki nongrep jong ngi ki dei ban shim kabu ban leh bha bad ban trei bha bad ka sorkar ka la ïarap ïa ki ban pynim ïa ka jingim jong u mar u ba mih ha ki kper jong ki sha ki ïew sawdong jong ka pyrthei ym tang ha Ri India”, la ong ka Kong Ampareen.
Shuh shuh ka Kong Ampareen ka la ong ba haba ki nongrep ki wan sha ki ïew pyninam kum kine kam don shuh kata ka jingong ban die naphang hynrei ki la donkam ban pynbit pynbiang ïa ki jingdie jong ki la ka long ha ka rukom song ne ka rukom pynmih.
Ka Kong Ampareen ka la ong ba ka jingïarap lem ïa ki nongrep ha ki liang baroh ka long kaei kaei kaba donkam eh ban leh bad wat lada kin don katto-katne kiba ong ba ka sorkar ka la shu phut ïa ka pisa hangne hangtei hynrei kito kiba kren pynrem bad kynthoh ïa ka sorkar ki don ka jingmut jingpyrkhat kaba lyngkot.
“Ngi tip ba kin don beit kiba ong ba ka sorkar ka pynlut pisa bad kumne kumtei hynrei kita kiba kynthoh ïa ka sorkar, phi don ka jingmut jingpyrkhat kaba lyngkot bad kaba rit palat, te ngin ïakren bad ki kynhun nongrep kiba don ïa ka jingmut jingpyrkhat kaba heh bad ka jingïohi jngai”, la kubur ka Kong Ampareen.
Ka Kong Ampareen ka la pynpaw ruh ba ka dap da ka jingsngewkmen ka mynsiem ban ïohi ba ki khun samla ka jylla ki ïadie ïa ki marbam kiba la pynmih napoh ka jylla Meghalaya hapoh katei ka ïew pyninam ha Bengalauru.
Ka Kong Ampareen ka la ai khublei ruh ïa ka tnad rep ka riang ka sorkar jylla kiba la shim ïa ka bynta ban ïasynran lem ïa ki kynhun nongrep ban wan pyninam ïa ki mar ki mata jong ki shapoh ka jylla Bengaluru.
Ka Kong Ampareen ka la ïathuh ruh ba ka jinglah die jong ki nongrep ïa u sohniamtra, sohtrun, shynrai Lakadong, sying, sohmrit khlaw bad kiwei kiwei ka la long ka jingmih kaba khraw bad ka jingkiew ka jingïohnong jong ki nongrep ka jylla mynta ka long da ki lak tyngka bad kane ka pynkiew ïa ka khajna jong ka jylla.
