Shillong, Nohprah 15
Ka tnad Customs, Shillong ka la ïoh kurup ïa ka ksiar kaba shong dor palat T.1 klur bad ïa u rynsun uba na China ïa uba la shalan be-aiñ lyngba ki jaka khappud.
“Hadien ka jingïoh jingtip kaba biang ba ka don ka ksiar (kaba nabar) kaba la shalan be-aiñ na shiliang khappud ban wanrah ha ka kali sha Barpeta, ki ophisar ka CCP-Shillong ki la bat ïa kawei ka kali ‘Maruti EECO’ ha ka janmiet jong ka 13 tarik mynta u bnai ha Diengpasoh,” la ong ka kyrwoh na ka shlem treikam Commissioner of Customs (Preventive), Shillong.
Hadien ka jingtohkit, la shem ba katei ka ksiar kaba la shalan tuh la buhrieh hapoh katei ka kali bad haba la wad ïa katei ka kali, la lap ïa ka ksiar (kaba nabar) kaba la buhrieh bha ha ka jaka kaba la shna kyrpang ha madan – ba ju pynshong ïa ka jaka shong briew ba hapdeng.
“Hadien katei, la lap ïa 20 tylli ki lyngkhot ksiar kiba la song bha bad ba la tah da ka ‘black tape’ ha 4 tylli ki jingsong. Ka jingkhia jong kitei ki lyngkhot ksiar ka long 2331.82 gram bad ki shong dor kumba T.1.42 klur,” la ong ka kyrwoh.
Haba ïadei bad katei ka jingkurup, la kem ruh ïa uwei u briew bad ka jingtohkit ka dang ïaid.
Ha kawei pat ka liang, ki ophisar ka tnad ha ka 14 tarik mynta u bnai ki la kurup 50 byrni u rynsun uba khia 950 kilo. Une u rynsun u dei na China bad u don ïa ka kyrteng ‘HUAGUANG’ – imat la khaïi tuh na shiliang khappud.
Ka tnad ka la ong ruh ba ka jingtohkit halor katei ka dang ïaid.
Ka tnad Customs ka ïai bteng ban shakri hok ban ïakhun ïa kiba bun jait ki kam be-aiñ kiba ju jia ha ki khappud ba kynthup naduh ka jingkhaïi tuh ïa ka ksiar, sikret, drok bad ki jingdih pynbuaid, pisa thok nalor kiwei-kiwei. Ka tnad ha kajuh ka por, ka ïatreilang bad kiwei-kiwei ki tnad ba khmih bad bat ïa ka aiñ.
Ka tnad ka kyrpad ruh ïa ka jingkyrshan jong kino-kino kiba lah ban ïarap ha ka jingïakhun ïa ki kam be-aiñ ha ki jaka khappud da kaba phah jingtip sha ka tnad.
Shuh shuh la kular ba ïa ki kyrteng jong ki nongpyntip ym tang ban buhrieh, hynrei kan don ruh ka skhim khusnam kaba lait na ka ‘Income Tax’.
