Shillong, Nohprah 15
Ka Rilum Khasi Jaiñtia ka dei shisha kaba kup da ka jingitynnad lyngba ka jingdon ki wah ki kshaid ba noh rymphum bad ki thwei bajngum nalor ki lum ki them bad ki lhuh kiba ithiang ban peitkai bad khring shisha ïa ki briew na kylleng.
Katba nang ïaid ki sngi ki por, ki jaka jngohkai ruh ki la nang bun ha kaba wat ki jaka jngohkai kiba ym pat ju tip ne bna mynno-mynno, la nang lap thymmai da ki nongshong shnong bad pyni sha ka pyrthei ïa ka jingitynnad jong kita ki jaka khamtam lada lah ban shna pynbha shuh shuh ïa ki lynti bad surok ban kham suk ki nongjngohkai.
Napdeng kiba bun ki jaka jngohkai kiba ki briew kim pat tip ne bna, ka dei ka jaka jngohkai kaba don sha thaiñ Jatah kaba hap Mawkynrew Block, East Khasi Hills district.
Kane ka jaka kaba itynnad ka dei kaba hap ha ki saw shnong, kita, ka shnong Jatah Nonglyer, Mawsir, Mawdulop bad Ksanrngi. Kane ka jaka ka dei kaba don ki kshaid ha kawei ka wah kaba la tip kyrteng kum ka Wah Pomksew.
Ban poi sha kane ka jaka, hap ban ïaid kjat kumba katto-katne minit na shnong Jatah Nonglyer. Katkum ka jingïathuh ki nongshong shnong, ka lynti kaba kham jan ban poi sha kane ka wah ba don kine ki kshaid ka dei na ka shnong Ksanrngi.
Ha kane ka wah Pomksew, ki don bun tylli ki kshaid bad lada lah ban shna ïa ki lynti bad surok, khlem artatien kan dei kawei na ki jaka jngohkai kaba khring bha ïa ki nongwankai.
La ïathuh ba kane ka jaka kaba itynnad kam da jngai shuh na ka Wah Umngot bad sha shiliang ka wah Umngot, ki don ki shnong kiba hap ha Amlarem kata ha thaiñ War Jaiñtia, West Jaiñtia Hills district.
Sawdong jong kane ka jaka, ki don ki jaka rep naduh ki pyntha kba, jaka rep synsar bad rep sohniamtra bad kiwei kiwei ki jingrep kiba ki nongrep ka thaiñ Riwar ki shaniah tylli ban ïoh ïa ka bam bad ka kamai kajih, bad ki don ruh ki wah kiba sngur kiba tuid bad don hajan ka pyntha kba.
Kane ka jaka ka dei kaba dang shu sdang pyni sha ka pyrthei bad ym pat don kano-kano ka jingtei jingshna khamtam ki lynti ne surok ban poi kham shajan jong kane ka jaka.
Mynta ngin ïohsngew katto-katne ki jingbatai shaphang kane ka jaka jngohkai na ki nongïalam ka Integrated Village Cooperative Society Jatah Nonglyer.
Na trai jong kane ka wah lada ïaid kjat hap kiew ïa u thieb uba jrong ban poi shajrong lum, bad ynda la poi hajrong lum, lah ban ïohi kyndiang ïa ka wah bad ki jaka rep kynthup ïa ka pyntha kaba don harud wah shathie sha them.
Ka jinglong jong kane ka jaka hajrong lum haba peit, ka ïasyrïem kum ka jaka jngohkai kaba don ha shnong Laitlum, kaba dei ka jaka jngohkai kaba la paw bha ha kane ka Jylla bad khring bha ïa ki nongjngohkai ban wankai.
Na ka liang ka shnong Jatah Nonglyer ha ryngkat bad ka Integrated Village Cooperative Society Jatah Nonglyer ka don jingthmu ban shna kum ka jaka peitkai lane ‘view point’ hangne bad ka buh ka jingkyrpad ïa ka Sorkar Jylla khamtam ka tnat jngohkai pyrthei ban phaikhmat lem sha kane thaiñ khnang ban lah ban kyntiew shuh shuh ïa ka kam jngohkai pyrthei ha nongkyndong ka ban long ka jingmyntoi ha ka kam ka jam bad kyntiew ïa ka ïoh ka kot ki nongshong shnong.
Khatduh ïawai shwa ban pynkut noh ïa kane ka khubor ngi kyrmen skhem ba lyngba ka jingïatreilang jong ki shnong kiba don marjan kita ka Jatah Nonglyer, Mawsir, Mawdulop bad Ksanrngi, bad lyngba ka jingkyrshan ki bor ba dei khmih, kane ka jaka jngohkai shisien ka sngi kan sa paw bad bna nam kumba long lem kiwei pat ki jaka jngohkai kiba itynnad.
