Shillong, Nohprah 15
Ka jingkhlad ka longkmie kaba 52 snem ka rta bad iehnoh shadien ïa 7 ngut ki khun na ka jingkylla ka sumo namar ka jingsniew palat ka surok ha Nongryngkoh ka la pynlong ïa u Bah Kansing Lynshiang uwei na ki ‘riew rangbah jong ka thaiñ Mawkynrew konstitwensi ryngkat ka Seng Samla Shnong Nongryngkoh ba kin sa leit ban ïakynduh ïa u Symbud Myntri Rangbah ka Jylla u Bah Prestone Tynsong uba peit ïa ka tnad shna surok ban kyrpad siang rong noh ïa ka surok kaba la sniew ha Nongryngkoh.
Ka jingsniew ka surok ha Nongryngkoh ka la pynlong ïa kawei ka sumo ha kine khyndiat sngi ban kylla ha jaka ba kiew namar u nongñiah um lah ban tehlakam ïa u ‘steering’ namar ka jingsniew palat ka surok haduh ba ka longkmie kaba thmu ban leit sha ïew Jatah ka la khlad noh ha katei ka jingjia.
Haba ïakren bad u Bah Kansing, u la pynpaw ka jingsngewsih ban ïohi ba kawei ka longkmie kaba don hynñiew ngut ki khun kan iehnoh shadien tang namar ka jingsniew palat ka surok ban leit sha Nongryngkoh.
U la ïathuh ba ma u ryngkat ki samla ka Nongryngkoh kin sa leit ban ïakynduh ïa u Bah Prestone Tynsong ban kyrpad ba ka sorkar jylla kan thaw ki lad ki lynti ban siang rong ïa ka surok na Nohron sha Nongryngkoh namar um kwah shuh ban ïohi ba ka jingkylla kali ha kane ka surok.
U la ïathuh ba namar ka jingsniew ka surok ki kali rit ki hap ban ïeng ha Nohron bad nangta kin sa ïaid da ka kjat.
Katkum ka jingbatai u President ka Seng Samla Nongryngkoh Bah E. Surong, u la ïathuh ha ka step jong ka 13 tarik mynta u bnai Nohprah kawei ka sumo kaba la kit ïa ki nongleit ïew haba kam lait shuh ban kiew ïa ka surok mar shu mih na shnong ka la kylla. Ha kane ka jingjia kawei ka longkmie kaba don khun 7 ki ngut ka la khlad noh bad la tep ha ka 14 tarik Nohprah 2023 katba kiwei kiba shong lang ki la mynsaw.
U la ïathuh ba ka surok ban leit sha Nongryngkoh kaba don 800 ngut ki nongthep vote hap ïaid na Nohron kaba jngai kumba lai kilometer. Kane ka surok kadei ba la shna na ka skhim PMGSY ka la sniew palat haduh ba ka la ishyrkhei ban ïaid ki kali.
U la pyntip ba ha ka 13 tarik mynta u bnai kaba dei ka sngi ïew, u nongñiah sumo u la kit ïa ki nongleit ïew kiba kit mar rep ban leit die sha ïew Jatah hynrei haba u la kiew ïa ka surok um lah shuh ban ïakhun. Kane ka sumo kaba la kylla ka la ban ïa kane ka longkmie haduh ba kan da khlad syndon katba kawei ka longkmie kaba shah ban da u nar ka la shu mynsaw.
