Shillong, Nohprah:
Ka Courtyard By Marriott Shillong, ka la rakhe ïa ka aïom lehkmen da kaba ka la pynlong ïa ka Annual Tree Lighting Ceremony ne ka jingpynmeh ïa ki light ba la pynpur ha u dieng ha ka sien ba nyngkong ha ka rukom kaba i shongkhia. Kane ka lympung, la pynlong ha ka 10 tarik u Nohprah, 2023, bad ka lomg ka dak jong ka jingsdang ka jingrakhe ïa ka aïom lehkmen.
La pdiang sngewbha ïa kito kiba la ïawan ban ïadon ryngkat da ka khmat phuh samrkhie, bad pynlong ïa kane ka janmiet kaba sngewtynnad. La pynkylla dur ïa kane ka jaka ba kan i ïahap bad ka jaka khriat, ha kaba la don ruh ki light kiba phyrnai, ki jingbuh pynitynnad, bad u dieng khristmas uba la pynïeng hapdeng. La pyndait bad pynpur ïa une u dieng, da ki jingwad kiba phyrnai, bad une u dieng u la ïeng kum ka dak jong ka jingkyrmen bad ka jingïatylli na ka bynta kane ka aïom lehkmen ka ban wan. Ha kane ka sngi la sakhi ïa ka jingïadonlang jong u Conrad Sangma, u Myntri Rangbah ba don burom ka jylla Meghalaya, kum u kongsan, ryngkat bad u Bah D P Wahlang, Chief Secretary ka sorkar Meghalaya, u Bah Paul Lyngdoh, Myntri ka tnad ki kam jngohkai bad i Kong R M Kurbah, Deputy Commissioner East Khasi Hills District.
Ka jingktik ne pynkhih mynsiem ha kane ka janmiet jong ka jingrakhe ka long ka jingangnud ban ïohi ïa ka jingpynmeh ïa ki light ba la pynpur ha u dieng, ha kaba baroh ki briew ki la ïawan lang ban ñiew ïa ki minit kiba khatduh ha shwa ban pynmeh ïa ki light. Ka jingdon jong une u dieng ïa uba la pyndait da ki light kiba itynnad bad i shongkhia, ka jingmeh jong ka light ba shat rong ksiar ka la pynshoh biej ïa ka mynsiem jong baroh kaba long ruh ka jingkyrpang jong kane ka aïom shuti. Ka mat pdeng jong ka jingrakhe kata, “Night Under the Stars,” ka la nang pynsngewtynnad shuh shuh, bad ai mynsiem ïa ki nongïashim bynta ba kin klet shwa ïa kiei kiei, bad khmih sha suiñ bad ngam ïalade sha ki jingkmen jingiphuh iphieng jong ka aïom. Kane ka jingrakhe ka long kum ka jingbtin lynti, kaba wanrah ïa baroh ki briew na ki bynta bapher bapher ban ïatylli, ban ngam ki jingmut jingpyrkhat sha ka jingphuh jingphieng jong ka aïom shuti, bad pynlong ïa kane ka jingrakhe hapoh jong ka jingthaba jong ki khlur ha ka por mynmiet ha sahit bneng ha Shillong kaba sah kynmaw.
Shuh shuh ha kane ka janmiet la don ruh ka jingïadih sha sngewbha, ha kaba bun jait ki jingbam la buh ban bam kum ka ‘Plum pudding’, ‘Sugar glazed cinnamon cookies’, ‘Carrot bad raisin cake’ , ‘Gingerbread cookies’. Nalor kine ki jingbam thiang, ki nongshah khot sngewbha ki la ïoh ruh ban bam ïa bun jait ki jingbam ba bang kum U ‘Gouda Croquette bad don bad u berry compote’, ‘Beer batter fish bad lemon aioli’, ‘BBQ Chicken’, ‘Sautéed Prawns’, ‘Wild mushroom Vol Au Vent’ bad kiwei kiwei.
La ïohi ba ki khynnah ki la ïoh lad ban ïakynduh ïa u Phadar khristmas ne Santa Claus, kiba la pynsngew ïa ka jingthrang jong ki, bad ki la ïoh ruh ïa ki jingai sngewbha kiba rit. La bteng shuh shuh ïa ka jingrakhe da ka jingtem bad ki jingrwai bad la don ruh ïa ka jingshad kyrpang, kaba pyntikna ban pynlong ïa kane ka janmiet baroh kawei kaba sngewtynnad.
Ha kane ka sngi jong ka jingthang ïa ki light ha u dieng khristmas ha ka rukom kaba i shongkhia ne ka Christmas Tree Lighting ha Courtyard by Marriott Shillong, u Tushar Nagar, General Manager, Courtyard by Marriott Shillong, u la ong, “Ngi sngewshong shit haduh katta katta ban pdiang ïa baroh sha ka Tree Lighting Ceremony ne ka jingpynmeh ïa ki light ba la pynpur ha u dieng Khristmas ha Courtyard by Marriott Shillong. Ka mynsiem jong ka jinglehkmen ka la dap ha baroh kawei ka Hotel, bad ka long kaba ïahap bad ka jingkmen kaba don ha kane ka jingrakhe. Nga ai khublei ïa u Myntri Rangbah ba don burom bad kiwei kiwei ki kynrem ki lyndan kiba la ïadonlang ha kane ka janmiet. Ka pyni ruh ïa ka jingskhem jong ka imlang sahlang bad ka jingïatreilang kaba pyni ïa ka jingmut ba ka Courtyard by Marriott Shillong ka ïeng, bad ngi khmih lynti ba ngin ïoh ban rakhe ïa kine ki jingrakhe kiba kmen bad ki nongwan ha ka lawei ban wan. “
