Shillong, Nohprah 17
U President ka Meghalaya Retired Deficit School Teachers Association (MRDSTA), Bah E.D. Nongsiang u la ong ba ka rai jong ka Sorkar ban wanrah noh da ki kot pule ka NCERT ha ki skul ka long kaba biang eh hynrei kam dei ban leh kyrkieh haba ïadei bad kane ka bynta.
“Ki kot te nga sngew ba ka biang hi tangba ka dei ban long kham suki khyndiat, kam dei ban pynkyrkieh. Shu buh phi pynmih mynta-mynta bad ong shim noh da kine ruh, kam long, hynrei ki kham biang ki kot NCERT ban jong ka Meghalaya Board of School Education (MBoSE),” la ong u Bah Nongsiang haba kren sha ki lad pathai khubor ha ka Sngi Saitjaiñ. Haba ban biang ba ka rai ban wanrah noh da ki kot NCERT lehse ka long kaba kyrkieh, u la pynkynmaw ïa ki por mynshuwa ha kaba ka MBoSE ka ju khot lang ïa ki nonghikai ban ïamir jingmut halor ki kot pule ba ka pynmih bad ki nonghikai ki ïoh ban ïashim bynta ban peit lang la ki biang ne em ki kot ban pyndonkam ha skul.
“Mynta ruh ka dei ban long kumjuh. Lada ka biang eh kata ka NCERT hynrei lada pynmih kynsan-kynsan…lada khlem ïakren badno-badno, khlem da ai por ïa ki khynnah, ki kmie ki kpa ba kin thied thymmai namar mynta kin hap bret noh ïa ki kot barim,” u la ong.
“Kumta kam long ban leh kyrkieh hynrei ka biang eh lada ki pyndonkam jong ka NCERT,” u la ong.
Na ka liang u Vice-President ka seng, Bah R.S. Marbaniang haba bynrap ïa katei ka bynta u la ong ba ka Sorkar ka dei ban khot ïa ki ‘riewshemphang kiba lah ban wanrah ïa ka bha ka miat na bynta ka Jylla.
U la ïathuh ruh ba hashuwa, ha kawei ka jingïalang, la ïakren ba ka Sorkar kam dei ban leh na bynta ka bha ka miat jong ki nongpynmih kot, hynrei jong ki khynnah pule (bad uwei na ki ophisar u la mih noh na katei ka jingïalang).
U Bah Marbaniang u la ong ruh ba kane ka Sorkar ka pyrshang ban leh ïa kaba bha hynrei namarba ki Sorkar ba mynshuwa kim shym la shim khia ïa kane, mynta ki lang lut ki jingeh. Shuh shuh u la bynrap, “Ka Sorkar ka dei ban leh eiei noh ïa ka mat halor ka pule-puthi kaba kynthup ïa ki khynnah pule bad ki nonghikai khnang ba ka Jylla kan ïaid shakhmat. Ha kajuh ka por, ka dei ban wanrah ïa ka pule-puthi kaba paka ha ka juk mynta.”
