Shillong, Nohprah 17
Ka jingdheng kali bad jingbeh ban poi kloi sha ki kam ki dup ka long pynban ka jingshim kabu jong kiba kamai ar shaka ha kane ka nongbah khamtam kito kiba shu kamai beaiñ khlem pat pynrung kyrteng bad ki kompani kiba la ithuh da ka Sorkar Jylla.
Ka Sorkar Jylla ka la dep ban mynjur ïa ka kyndon aiñ kaba tip kum ka Meghalaya Taxi Aggregator Operation Rules, 2020 ha kaba yn shah ïa ki nongñiah ar shaka ban kamai da kaba pynrung kyrteng shwa bad kano-kano ka kompani kaba la ïoh laisen na ka Sorkar. Ka Sorkar Jylla ka la ithuh ïa ki ar tylli ki kompani trai Jylla kita ka Jetz 24×7 bad Anyride kiba la ïoh laisen ban pynrung ïa ki nongñiah ar shaka ban kamai da kaba pyndonkam ïa ka App jong ki. La ïathuh ba ki don ki ar shaka kiba kamai khlem pat pynrung kyrteng bad ki kompani kiba la ïoh laisen na ka Sorkar Jylla bad kane ka long beaiñ.
La ong ruh ba ka jingshim kabu ki nongñiah ar shaka khamtam haba jur ka dheng kali bad haba kyrkieh ki nongleit nongwan ban poi kloi sha ka jaka kaba ki dei ban leit.
“Tang na Motphran sha IGP ki pan ïa ka bai shong ar shaka haduh 70 tyngka. Kane ka dei ka jingshim kabu ïa ngi ki nongleit nongwan kiba donkam ban shong da ki ar shaka,” la pynpaw iwei na ki nongleit jingleit iba sngewdiaw ïa ka jingshim rem ki nongñiah.
Ha ka jingshisha, ka dor jong ka bai kali lada shong da ka ar shaka ka dei T.10 shi kilometre, bad lada shong tam sa shi kilometre, hap siew tam sa T.5 kaba mut ba lada shong 2 kilometre, ka dor ka long T.15. Kiba bun ki nongleit nongwan ki ong ïa ki kali kamai naduh ki taksi la lah ban ithuh na ka rong jong ka kali bad ka rong stem jong ki nombar kali, hynrei ïa kine ki ar shaka ym lah satia ban ithuh kino kiba kamai bad kino ki bym kamai namar ki long lut kumjuh naduh ka rong jong ki ar shaka bad ka rong ki nombar.
Namar kata, ka la donkam ïa ka Sorkar ban pyrkhing ïa kine ki ar shaka hynrei kam don ka jingshngaiñ ïa ki nongleit nongwan khamtam ka jingshim rem ïa ka bai shong ar shaka. Shuh shuh la ong ba wat la ka Sorkar kam ïathuh ïa ki ar shaka kiba kamai ha ka kyrteng ka Rapido, hynrei ki dang don ki nongñiah ar shaka kiba kamai ha ka kyrteng jong ka Rapido da kaba pyndonkam ruh ïa ka App jong kane ka kompani.
La ong ba ka Rapido kam dei ka kompani na kane ka Jylla bad kam pat ïoh ruh ka jingithuh na ka Sorkar Jylla.
Nalor nangta la ïathuh ba ka Rapido ka dei kawei na ki kompani kaba pynïaid ïa ki bike-taxi kaba la shah maham ha kiwei pat ki Jylla kum ha Karnataka, Maharashtra bad ha nongbah Delhi namarba kim dei kiba la ïoh laisen.
Ha kane ka Jylla, kiba thmu ban pynkamai ïa ki ar shaka ki hap ban bud ïa ki kyndon katkum ka Meghalaya Taxi Aggregator Operation Rules, 2020.
Na ka bynta kawei ka ar shaka, u nongñiah un hap ban siew kum ka bai laisen kaba long T.700 shisnem, katba ka bai permit ka long T.200 shisnem lada ki kamai tang ha ki jaka kiba la batai lypa kum ha nongbah ne district. Hynrei lada kamai ha baroh kawei ka Jylla, ka bai laisen ka long T.1300 bad ka bai permit ka long T.200 shisnem.
Kumta na ka liang ka Sorkar ruh ka la kyntu ïa kiba pynkamai ïa ki ar shaka ba kim dei ban kamai beaiñ hynrei dei ban pynrung kyrteng bad ka tnat Transport jong ka Sorkar Jylla lyngba ki Aggregator kiba la dep ïohi laisen.
Ka jingdon kine ki ar shaka kiba kamai khlem kot khlem sla, ka ktah bad nang pynhiar ïa ka jingkamai ym tang ïa ki taksi kiba ju kamai da kaba siew khajna sha ka Sorkar, hynrei ka ktah ruh ïa kiwei pat ki ar shaka kiba pynkamai bad kiba la dep ban pynrung kyrteng bad ki kompani kiba pynïaid ïa ki bike-taxi bad siew ruh ïa ka khajna.
