Shillong, Nohprah 17
Kawei ka ïingbishar ha nongbah dang shen ka la ai jingbit ïa ka Myntri ka tnat Aiñ, ka Kong M Ampareen Lyngdoh, ba kan leit sha ka Ri Vietnam na ka bynta 14 sngi bad ha kajuh ka por, ka ïingbishar ka la kyntait ïa ka jingpyrshah ba la pynpaw na ka liang ka Central Bureau of Investigation (CBI) halor kane ka jingkwah leit bar ri ka Myntri.
Lah ban kdew ba ka Kong Ampareen ka la pan jingbit na ka ïingbishar kaba dei ka Special CBI Court, Shillong ban leit sha Vietnam na ka bynta 14 sngi, kata, naduh ka 22 tarik Nohprah, 2023 haduh ka 4 tarik Kyllalyngkot, 2024.
Halor katei ka jingpan jingbit ka Kong Ampareen, kaba long kawei na kiba la shah mudui ha ka CBI (Case No. 2/2020) halor ka kynrum-kynram kaba ïadei bad ka jingthung kam nonghikai sorkar, na ka liang ka CBI ka la ai da ka jingthoh ban pynpaw ïa ka jingpyrshah.
Ka CBI ka la ong ba ka jingailad ïa ka Kong Ampareen ban leit shabar jong ka Ri na ka por sha ka por kan ai ïa ka khubor kaba bakla sha ki para nongshah mudui bad ki ‘riew paidbah ba ka ïingbishar ka buh ïa kane ka nongshah mudui ha kawei ka kyrdan namar ka dei ruh ka Myntri Sorkar.
Ka CBI ka la ong ruh ba baroh ki nongshong shnong ki long katjuh hakhmat jong ka aiñ. Da kaba shah ïa ka Kong Ampareen ban leit shabar jong ka ri man la ka por, ka CBI ka la ong ba kane kan pynsngew ïa ka Kong Ampareen) ba kam dei satia kata kaba la shah mudui ha kano-kano ka mukotduma bad kan pynsngew ruh ïa ka ba ka ïingbishar kan ym nud ban kyntait ïa ka jingkyrpad jong ka namar ka dei ka Myntri ka tnat aiñ ha ka sorkar ba mynta.
Hynrei na ka liang ka muktiar jong ka Kong Ampareen ka la kdew ba ka nongshah mudui kam shym la pyndonkam bakla ïa ka kyrdan kaba ka bat ban tuklar ïa ka jingtreikam ka ïingbishar. Ka muktiar ka la ong ruh ba katba ym pat pyllait ïa ka nongshah mudui na ki jingkynnoh, ka Kong Ampareen ka don ka hok ban leit ban wan, bad kam ju don ka khep ba ka la pynkheiñ ïa ki kyndon ba la buh da ka ïingbishar.
Shuh shuh ka muktiar ka la kdew ruh ba katei ka nongshah mudui ka la leit sha France bad Dubai ha kaba ïadei bad ki kam sorkar bad sha Thailand bad London na ka bynta ki kam shimet. Hynrei ka la ong pat ba ka Kong Ampareen ka khlem leit sha London naduh ka 12.07.2023 haduh ka 18.07.2023.
La pynkynmaw ba ka Supreme Court ha ka mukotduma ba la ai da u Chandraswami pyrshah ïa ka CBI (AIR 1998 SC 2697) ka la pynmih hukum ba u nongmudui un ym lah ban mih na ka Ri tad haduh ban da ïoh jingbit shwa na ka ïingbishar halor ki kyndon ba ka ïingbishar ka lah ban buh.
Na ka liang ka ïingbishar ka la ong ba man la ka por ba ka Kong Ampareen ka la leit shabar ri, ka la ju wanphai biang sha la Ri. Ka la ong ba ka jingpynsngew jong ka CBI ba lada shah ïa ka nongshah mudui ba kan leit shabar ri kan ai ïa ka khubor kaba bakla sha ki para nongshah mudui bad ki ‘riew paidbah, bad ba ka nongshah mudui ka ïoh da kawei pat ka rukom bishar, ka long ka bym don nongrim.
Ka ïingbishar ka la kdew ba haduh mynta, ym pat shym la don napdeng ki para nongshah mudui kiba la wan sha ka ïingbishar ban pan jingbit ban leit shabar ri bad namarkata, ka jingpynsngew jong ka CBI ka long kaba bakla.
Shuh shuh ka la ong ba ka Supreme Court ka la pynksan ba ka hok ban leit shabar ri ka long shi bynta na ka hok ban im bad ka hok jinglaitluid shimet ba la pynkhamti da ka Article 21 jong ka Riti Synshar ka Ri India, bad yn ym lah ban pynduh ïa kane ka hok lait noh sa tang lada ka ïadei bad ka rukom ba la buh ryntih da ka aiñ.
Namarba ka CBI ka khlem lah ban pyni da ki kot ki sla kumno katei ka nongshah mudui ka la pynkheiñ ïa ka jinglaitluid ba la ai ha ka, ka ïingbishar ka la ong ba kam ïohi ba kan don kano-kano ka daw ban ym pdiang ïa ka jingkyrpad ba la ai da ka nongshah mudui.
Namarkata, ka ïingbishar ka la ai jingbit ïa ka Kong Ampareen ban leit sha Vietnam na ka bynta 14 sngi. Hynrei ha kajuh ka por, ka ïingbishar ka la hukum ïa ka Kong Ampareen ba hashwa ba kan leit sha Vietnam, ka dei ban ai da ka jingthoh sha ka CBI ha kaba ïadei bad ka jingleit jong ka bad ban pyntip haei kan shong kan sah ha kito ki 14 sngi ha Vietnam.
Ïa kane ka hukum na ka ïingbishar la sot na ka ‘website’ https://shillong.dcourts.gov.in.
