Shillong, Nohprah 17
Wat la ka NPP kam pat wad kyrtong ban ïakhun ïa ka ilekshon MDC na Mawkynrew konstitwensi hynrei la sngewthuh ba ka jingpan tiket kan long kaba jwat namar ha kane ka konstitwensi ka don ar kynhun.
Kine ar kynhun ka dei hapdeng u MLA ba mynta u Bah Banteidor Lyngdoh uba la jop na ka PDF bad pynïasoh sha ka NPP tang hadien ar bnai ba la jop ïa ka ilekshon. Katba kawei pat ka dei jong u Bah Kansing Lynshiang u kyrtong ka NPP uba la shah rem ha ka ilekshon MLA ha u Bah Banteidor uba dang don haduh mynta wat la ïa ki nongkitkam jong u la dep pynduh pyndam noh mar shu rung u Bah Banteidor.
U Bah Kansing kum u dkhot bapura jong ka seng NPP u dang trei shitrhem beit ïa ka seng NPP wat la um bat shuh ïa ki kam ba hakhmat hynrei ki nongkyrshan jong u kiba don palat hynñiew hajar vote kaba u la ïoh ha ka ilekshon MLA ba la dep ki dang don beit mynta bad ka NPP.
Haba pyrshang ban twad jingmut haba ïadei bad u kyrtong ban ïakhun ïa ka ilekshon MDC na Mawkynrew la sngewthuh ba ka NPP kan jwat bha ban ai tiket namar u Bah Banteidor un sei la u jong u kyrtong bad u Bah Kansing un sei la u jong.
Haba pyrshang ban ïakren bad u Bah Kansing Lynshiang ha kine ki sngi, u la pynpaw ba um kwah ban ong eiei namar haduh mynta ka NPP kam pat khot ïa ki nongkitkam ban ïakhun ïa ka ilekshon MDC.
“Nga hun beit katba ka seng NPP kan ai tiket ïa uno-uno uba ka la ibit” u la ong.
Nalor nangta, u Bah Kansing u la ong ba ïa mynta u kwah ban shakri ïa ki paidbah jong ka Mawkynrew konstitwensi wat la u dei tang u ‘riew paidbah.
Haduh mynta u bnai Nohprah ka seng NPP kaba bat ïa ka bor synshar ha ka jylla kam pat wad kyrtong na bynta ka ilekshon MDC namar kane ka sorkar kan nym pynlong ïa ka ilekshon ha u snem 2024.
