Shillong, Nohprah 17
Ka Voice of the People Party (VPP) ka la kyntu ïa ka Sorkar ban pyndap noh ïa ki kam kiba sah thylli ha ka tnad ka rep ka riang bad Horticulture ha ka thaiñ Ri-Bhoi.
Ki kam kiba sah thylli ha Ri-Bhoi distrik ki kynthup ïa ka Horticulture Develop-ment Officer (HDO) (Hq), Nongpoh kaba sah thylli naduh u snem 2013, Horticulture Development Officer (HDO) Umling Block kaba sah thylli naduh 2017, Horticulture Development Officer (HDO) Umsning Block kaba sah thylli naduh 2020, Agriculture Development Officer (ADO) Marketing Nongpoh kaba sah thylli naduh 2019, Agriculture Development Officer (ADO) Bhoirymbong Circle kaba sah thylli naduh 2010, Agriculture Development Officer (ADO) Patharkhmah Circle kaba sah thylli naduh 2016, Agriculture Development Officer (ADO) Umling Block kaba sah thylli naduh 2020 bad Agriculture Development Officer (ADO) (Hq) Nongpoh kaba sah thylli naduh 2020.
“Nga kyrpad ba phin shim khia lem mardor halor kane bad ban shim ki sienjam kiba donkam ban pyndap noh kloi ïa kitei ki kyrdan kam ba sah thylli khnang ban pyntikna ïa ka jingïaid beit ïaid ryntih jong ki ophis treikam,” la ong General Secretary ka VPP, Dr. Ricky A.J. Syngkon ha ka kyrwoh sha ka Myntri ka tnad ka rep ka riang ka Jylla, ka Dr. M. Ampareen Lyngdoh.
Ha kajuh ka por, u la pynsngew ha ka Myntri ban pyrkhat ha ka ban thaw shuh ïa ki kam ha katei ka tnad khamtam ha Ri-Bhoi kumjuh ha kiwei-kiwei ki distrik ha ka liang ka rep ka riang, thung soh, thung jhur, syntiew bad kiwei-kiwei.
“Ka rep ka riang ka dei u budlum jong ka ïoh ka kot ka Jylla ha kaba bun na ki nongshong shnong ki shaniah ha ka rep ka riang bad ki tnad ba ïasnoh bad ka. Ka tnad kumta ka donkam ban shim khia bad pynleit jingmut ym tang haba ïadei bad ka jingsdang ïa ki skhim bapher-bapher, hynrei kaba kham kongsan ban pyntreikam ïa ki,” u la ong.
Shuh shuh u Dr. Syngkon u la bynrap ba wat la ka jingpyntreikam hok ïa ki skhim bad ki sienjam ka shong ha ki ophisar ba dei khmih, hynrei kaba sngewsih ka long ba ki don bun tylli ki kam kiba sah thylli la bun-bun snem khamtam ha Ri-Bhoi District.
