Mawkyrwat, Nohprah 17
Ki paidbah jong ka shnong Mawsaw ha ka step ka 16 tarik u Nohprah ki la lap ïa ka metiap jong kawei ka longkmie kaba la thiah lyngktar ha kawei ka pyntha kba.
Ïa katei ka longkmie la tip kyrteng kum ka Kong Miandaris Ïawphniaw (65 snem ka rta) na ka shnong Mawsaw, South West Khasi Hills District.
Katkum ki tyllong khubor ba la ïoh lum na ki bahaïing hasem bad ki pulit, la ïathuh ba katei ka longkmie ka dei kaba don jingshitom bad ha ka janmiet jong ka 15 tarik, ka la mih na ïing ban leit donkam hynrei ka khlem wan phai shuh sha ïing.
Ïa ka met jong ka Kong Miandaris Ïawphniaw la lap da ki paidbah ha ka step kaba bud na kawei ka pyntha kba bad hadien kata ki la pyntip noh mar-mar sha ki pulit ka Mawkyrwat.
Ha kaba ïadei bad kane ka jingjia, ki bahaïing hasem jong katei ka longkmie ki la kyrpad ban pyllait noh ïa ka met na ka ‘Post Mortem’ bad ïa ka met la aiti noh ha ki bahaïing hasem ba kin pyndep ïa ka niam ka rukom.
