Shillong, Nohprah 17
U President ka Hynñiewtrep Achik National Movement (HANM) Bah Lamphrang Kharbani u la pyntip ba ma u ryngkat u General Secretary Bah Kyllang Thongni ki la pynkhreh ban leit shong shah thngan hakhmat ka India Gate kaba don ha nongbah New Delhi.
Haba ïakren bad u Bah Lamphrang u la ïathuh ban pynurlong ïa ka jingdawa jong ka seng ban ithuh ïa ka ktien Khasi, Inner Line Permit bad ban pynbeit ïa u pud u sam donkam ban ïakhih paidbah beit.
U la ïathuh hadien ba ki dkhot ka seng kiba poi palat 200 ngut kiba leit shong kyllaiñ myngor ha Delhi ha kine ki bnai ba la dep, ka Ministry of Home Affairs ka sorkar India ka la ai jubab.
U la pynpaw ka jingsngewkmen ba ka Sorkar India ka la jubab da kaba kdew ba ka mat pynbeit pud, ka Sorkar India ka la phah sha ka Central State ba kan pynbeit ïa u pud u sam hapdeng ka sorkar Assam bad Meghalaya.
Nalor nangta, u la ïathuh ba ïa ka ktien Khasi ruh ka Sorkar India ka lah ban ai tangba ka khlem ïathuh lano kan ai hynrei ïa ka Inner Line Permit ka khlem kren shai la kan ai ne kam ai.
“Kumba ngi la dep smai ba ngin ïakhun haduh ban da jop, ngi la rai ban leit ïakhih biang sha Delhi kata ngin ïakhih beit ha jaka paidbah hynrei ïa ka por ngin sa pyntip” u la ong.
U Bah Lamphrang u la ïathuh ba ïa ka ktien Manipuri la ithuh da ka Sorkar India ha ka khyrnit kaba phra tang namar ba ki nong Manipur ki leit ïakhih sha Delhi, kumjuh ruh ïa ka ktien Khasi hap ban leit ïakhih beit sha Delhi.
“Ngi la shim ïa ka rai ba ma nga kum u President bad u General Secretary ngin leit ban shong shah thngan hakhmat India Gate ryngkat ki dkhot khnang ban pynsngew syndon sha ka shkor ka Sorkar India” u la ong.
U la pyntip ba watla ka jinglut ka bun bha ban leit sha Delhi hynrei ka seng kan leit biang ha kine ki bnai.
“Kam lei-lei lada ki pulit kin kem ïa ngi hynrei namar ka dawbah jong ka jaidbynriew ngin leit biang sha Delhi” la ong u Bah Lamphrang.
Namar kata, u don jingkyrmen ba shisien ka sngi ka Sorkar India kan sa pynurlong ïa ki jingdawa jong ngi lada ngi bteng ban ïakhih sha Delhi.
