Nongstoiñ, Nohprah 17
Ha ka Sngi Saitjaiñ, ki paidbah nongshong shnong ka thaiñ Aradonga, WKHD, ki la ïamih paidbah ban pynlong ïa ka jingïaid paidbah kaba jai-jai ban pynrem ïa ka jingshah tied bad shah shoh jong 2 ngut ki nonghikai ka Rangsapara Secondary School ha ki runar ha kawei na ki jaka ha ka shnong Mynniar katba ki dang wanphai na Nongstoiñ ban leit phai sha Rangsapara.
Lah ban kdew hangne ba ha ka 11 tarik u Nohprah, u S. Chetri (49 snem ka rta) bad u T.R. Sangma (48 snem ka rta) ki la shah kdong ha ki runar ha Mynniar katba ki dang wanphai na Nongstoiñ da ka thuk-thuk ban leit sha Rangsapara ha kaba ki la shah tied bad shah lute ruh ha ki runar ki bym lah ban ithuh.
Ha katei ka sngi, ïa katei ka jingïaid paidbah la pynlong da ka Dorbar Shnong jong ka Aradonga ha ryngkat ka jingïasnohktilang ki kynhun Sengbhalang ba kynthup ïa ka GSU, FKJGP, ADE, AHAM, AYWO, HNYM bad Mothers Union bad la pynkut ha ïew Athiabari bad bteng pat sa ka jingïalang paidbah. Haba kren ha katei ka jingïalang, na ka liang ki nongïalam jong ki kynhun seng, ka dorbar shnong kumjuh na ki paidbah, ki la dawa jur na ki bor jong ka aiñ ba ki dei ban thwet haduh ban da lap ïa ki runar bad ruh ban pynshitom da kaba tyngeh.
Shuh shuh nalor ka jingïaid paidbah, ha katei ha ka janmiet jong katei ka sngi ka la don ruh ka jingthang mombati kum ka dak ban sngewlem ïa u nonghikai uba la khlad noh.
