Shillong, Nohprah 17
Ka seng Congress ha ka Ri kan plie ïa ka jingpan synñiang pisa na ki paidbah nongshong shnong ha ka Lah Sngi U Blei ha kaba kino-kino ki lah ban noh synñiang T. 138, T. 1,380, T. 13,800 ne palat lyngba ki rynsan ‘online’, bad kane ka long kum shi bynta na ka jingpynkhreh ïa ka ilekshon MP Lok Sabha ka ban long ha u snem ban wan.
Ïa kane ka jingpan synñiang pisa na ki paidbah la ai kyrteng ‘Donate for Desh’ lane Synñiang na bynta ka Ri, bad la pynbna lyngba ki lad pathai khubor ha ka Sngi Thohdieng ha New Delhi da ki heh ka seng Congress kum u K.C. Venugopal, MP & General Secretary (Organisation), AICC bad u Ajay Maken, Treasurer, AICC.
U Venugopal u la ong ba ka jingsdang ïa katei ka jingpan synñiang na ki paidbah ka dei kaba la ïoh mynsiem na ka sienjam ba la shim da u Mahatma Gandhi ha u snem 1920-21 ha kaba u la sdang ïa kata ka ‘Tilak Swaraj Fund’. U la ong ba ka jingthmu jong katei ka jingpan synñiang na ki paidbah ka long ban pynkup bor ïa ka seng Congress ban thaw ïa ka Ri India ha kaba kan don ka jingsam kaba mar biang ïa ka spah ka phew.
Ka jingpan synñiang ka ïatakhuh ruh ba ka jingdap 138 snem ka seng Congress bad namarkata, la kyntu ïa ki nongkyrshan ba kin noh synñiang T. 138 lane T. 1,380, T. 13,800 lane palat ïa kata. Ki paidbah ki lah ban noh synñiang da ka leit sha ki artylli ki rynsan ‘online’ – donateinc.in bad na ka ‘website’ ka Indian National Congress www.inc.in.
Kitei ki heh Congress ki la ong ba yn plie ïa kane ka jingpan synñiang na ki paidbah da u President ka seng, u Mallikarjun Kharge lashai ka sngi ha New Delhi.
Haduh ka 28 tarik Nohprah, kaba dei ka tarik ba la thaw ïa ka seng Congress, ka jingshim synñiang kan long lyngba ki rynsan ‘online’ bad hadien kata, kan don pat sa ka jingleit sha ki thliew ïing da ki dkhot ka seng. Ka jingthmu ka long ban ïoh jingsynñiang la kumno-kumno na ki 10 tylli ki longïing kiba don ha kawei ka ‘Polling Station’. Kaba duna duh ka jingnoh synñiang kan long T. 138 na kawei ka longïing.
Ha kajuh ka por, la kyntu ïa ki nongkitkam ka seng, nongmihkhmat, nongïalam ki shnat ka seng, President DCC, President PCC bad baroh ki nongkitkam ha ka AICC ba kin noh synñiang ym duna ïa ka T. 1,380 marwei. La bthah ruh ïa ki President ka seng Congress ha ki jylla ba kin wad ïa ki briew kiba lah ban noh synñiang T. 1,380 lane T. 13,800.
“Kane ka sienjam ba ngi shim kan pynthikna ba ka saiñdur jong ngi na ka bynta ban ïoh ïa ka Ri kaba kham bha kan long kaba jop,” la ong kitei ki heh Congress da kaba bynrap ba kane kan long ka jingnoh synñiang paidbah kaba heh tam da kano-kano ka seng saiñpyrthei ha ka Ri India.
La pyntip ruh ba ha ka 28 tarik Nohprah, ka Congress kan pynlong ïa ka jingïalang kaba heh ha Nagpur bad la khmih lynti ba la kumno-kumno 10 lak ngut ki nongïalam bad dkhot ka seng kin wan ban ïashim bynta.
