Shillong, Nohprah 17
Ka Voice of the People Party (VPP) ka la kyntu ïa ka Sorkar ban wanrah ïa ki jingpyrkhing ki ban khang ïa ka jingwan poi jong ki syiar lem bad kiwei-kiwei ki mrad bam doh na shabar na bynta ka bha ka miat jong ki nongrep ri jingri ka Jylla.
Ha ka kyrwoh sha u Myntri ka tnad kam ri jingri, Bah A.L. Hek, u General Secretary ka VPP, Dr. Ricky A.J. Syngkon u la ong ba kane ka dei ka aïom ha kaba ka jingdawa na bynta ki jait doh bapher-bapher ka jur bha bad ka por jong ka jingkiew ha ka ïoh ka kot na bynta ki nongrep ri-jingri hynrei ha kajuh ka por, kiba bun ki nongpynmih bad nongkhaïi mar nabar ka Jylla ki ju shim kabu barabor ha kum kane ka por da kaba rung sha ki ïew ki hat ban pynshlei ïa ki mar ki mata jong ki.
U la ong ruh ba da ka jingthmu ban ïoh bynta lang ha ïew ha hat, kitei ki nongkhaïi ki khynñiat sharud ïa ki nongkhaïi ka Jylla ban ïoh ïa ka lad ban kamai.
“Kane ka long ka rukom khaïi ka bym ïahap satia na ka liang ki bar Jylla – kaba ktah pat ïa ki nongrep, nongpynmih bad nongkhaïi mar jong ngi,” u la ong.
Ha kawei ka liang, haba kdew ba ka lah ban long ba katto-katne ki ‘dealer’ nangne ki lah ban ïadon bynta ha katei ka kam (ïa kaba ym lah ban kyntait), u Dr. Syngkon u kyntu ïa ka Sorkar ban pynshitom ïa kitei ki briew halor katei ka kam ka bym ïahap satia bad kaba be-aiñ.
“Ka don ruh ka jingpynhiar dor na ka liang kine ki nongkhaïi nabar ban weng ïa ka jingïaleh ha ka liang ka dor bad ki nongpynmih mar bad nongkhaïi kiba nangne,” u la ong.
Nalor kane, utei u nongïalam u la ong ba ka jingwanpoi jong ki syiar na shabar ka buh jingma ruh ïa ka koit ka khiah bad jingshngaiñ jong ki nongbam doh naba kam don ka rukom treikam kaba la buh kyrpang ban khmih bniah ïa ka koit ka khiah jong ki syiar kiba wan nabar.
“Ngi kyntu jur ïa ka Sorkar ban tuklar mardor ïa katei ka bynta da kaba shim ïa ki lynti pyrkhing ban khang ïa ka jingwan poi ki syiar ba nabar lem bad kiwei-kiwei ki mrad bam doh na bynta ka bha ka miat jong ki nongrep ri jingri ne da kaba buh/pynbeit ïa ka dor na bynta ka bit ka biang jong ki nongrep ka Jylla,” u la bynrap.
Shuh shuh ka seng ka la ai jingmut ïa ka Sorkar ban tuklar ha ka liang ka ‘insurance’, ‘subsidy’ haba ïadei bad ki jingdonkam ha ki kam ri jingri, kumjuh ka mat treikam halor ka khajna ba ïadei bad ki mrad ba wan nabar na bynta ka jingïohnong kumjuh ban ïada bad pynshlur ïa ki nongrep ri jingri jong ka Jylla.
