Shillong, Nohprah 18
Wat la ka hamsaïa ka la sawa ba u Myntri Rangbah barim u Dr Mukul Sangma uba dei u MLA ka TMC u lah ban poi noh sha ka BJP lem bad ka kynhun jong u, hynrei ka Congress kaba dei ka seng saiñ pyrthei kaba u la longdoh longsnam bad la don da ki phew snem, ka dang ap ïa ka kaiphod la un dang wanphai ne em sha ka seng.
Ha ka jingshisha, ka Congress ka ap ïa ka kaiphod na ka Deborah Ch Marak, kawei na ki nongïalam kaba la don bad Congress ha kane ka Jylla.
Ka Congress ka la dep ong ba ka kloi ban pdiang lada wanphai biang ki nongïalam bad ki MLA barim sha ka seng.
Kum ban pynkynmaw, u Dr Mukul u la phet noh na ka Congress la palat shisnem kata ha u Naiwieng 2022 ha kaba u la leit rung sha ka TMC ryngkat bad 11 ngut ki MLA hashwa ban leit sha ka ilekshon MLA 2023.
Hynrei ka TMC ka khlem lah ban thaw pyrthei ha kane ka Jylla ha kaba ka la jop tang 5 ngut ki MLA kynthup ïa u Dr Mukul.
U nongïalam ka Liang Pyrshah u Bah Ronnie V Lyngdoh ruh u kubur ba ka Congress ka dang pyrshang ban wanrah biang ïa ki nongïalam barim kiba la phet na ka Congress namarba ka Congress ka dei kaba kdup lut ïa baroh khlem peit shiliang khnang ban ïoh ban shakri lang ïa ki paidbah bad ïa ka Jylla.
Haba kylli shaphang u Dr Mukul Sangma, u Bah Ronnie u la kubur ba ïa kane ka bynta la ieh ha ka nongïalam ka Deborah Ch Marak ban ïakynduh ïa u bad ban phah ïa ka kaiphod lada donkam.
U la ong ba ma u hi shimet um don kano-kano ka jingtip haduh mynta namar kane ka kam la ieh ha ka Deborah shimet ban pynïaid ïa ka kam.
