New Delhi, Nohprah 18
Haba ïadei bad ka jingkiew jong ka jingdon ki briew kiba shah ktah ha ka COVID-19 ha katto-katne ki Jylla/UT ha India bad ka jinglap ïa ka jingshah ktah banyngkong ha u jait khñiang JN.1 bathymmai jong ka COVID-19 ha ka ri, u Secretary ka tnad ka koit ka khiah ka Sorkar Pdeng, u Sudhansh Pant, u la phah shithi sha ki Jylla/UT, da kaba kdew ïa ka jingdonkam ban peitngor halor ka jinglong-jingman ka khlam COVID hapoh ka ri.
U la ban jur, “Namar ka jingïatreilang ba na ka por sha ka por hapdeng ka Sorkar Pdeng bad ki Sorkar Jylla, ngi la lah ban pynduna ïa kane.”
Ha kawei ka liang, namar ka jingïai bteng ban saphriang ka jingpang COVID-19, ka long kaba donkam ban pyntyllun ïa ki kam ban khmih bniah ïa ki jingtynjuh ha ka liang ka koit ka khiah.
U Secretary haba kdew ïa ki lad ban tehlakam ïa ka COVID, u la ong ba da kaba buh jingmut ïa ka aïom lehkmen ban wan, la bthah ïa ki Jylla ban pynbiang ïa ki lad ki lynti ba kongsan ha ka liang ka koit ka khiah lem bad kiwei-kiwei ki jingpynbit jingpynbiang ban pynduna ïa ka jingma jong ka jingkiew ka jingsaphriang ka jingpang da kaba bud ryntih ïa ki kyndon haba ïadei bad ka koit ka khiah (https://www.mohfw.gov.in/pdf/OperationalGuidelinesforRevisedSurveillanceStrategyincontextofCOVID-19.pdf).
La kyntu ruh ïa ki Jylla ban peitngor bad pyntip ïa ki jingpang Influenza-like Illness (ILI) & Severe Acute Respiratory Illness (SARI) ha ki distrik ha baroh ki jaka sumar na ka por sha ka por ba kynthup ha ki rynsan Integrated Health Information Platform (IHIP), khnang ban lap ïa ka jingkiew ha ka jingdon kiba shah ktah.
Ha kajuh ka por, la ai jingmut ruh ïa ki Jylla ban pyntikna ïa ka jingpeit bniah ha baroh ki distrik katkum ki kyndon ka COVID-19 bad ban buh jingtip halor ka RT-PCR bad ‘Antigen test’.
Shuh shuh la pynshlur ïa ki Jylla ban pynbun ïa ka jingpeit bniah lyngba ka RT-PCR bad ban phah ïa ki nongmuna ba shah ktah na bynta ka ‘genome sequencing’ sha ki ‘Laboratory’ ka Indian SARS COV-2 Genomics Consortium (INSACOG) ban lap biang por lada don ba shah ktah thymmai hapoh ka ri.
