Shillong, Nohprah 18
Ka Khasi Students’ Union (KSU) ha ka Lah Sngi U Blei ka la kynmaw burom ïa ka lyngkhuh sngi ïap ba 83 jong u Myllung Soso Tham.
Kum ka jingkynmaw burom ïa une u ‘riewkhraw ka jaidbynriew, ka seng ka la buh ruh ïa ki syntiew hakhmat mot sah kynmaw jong u Myllung uba don ha NEHU, Shillong.
“Haba ngi ong ki ‘riewkhraw, don ki ‘riewkhraw kiba ïaleh da ka wait, hynrei une u ‘riewkhraw u ïaleh da ki jingthoh jong u. 83 snem mynshuwa, u lyoh ba dum u la wan tap noh ïa ka ri bad ka jaidbynriew hadien ba ngi la duh noh ïa une u nongprat lynti lyngba ka thoh ka tar,” la ong u Vice-President ka seng, samla Biangbor L. Paliar haba ai jingkren ha ka jingïalang ha kane ka sngi.
U la ong ruh ba une u ‘riewkhraw u ai ki kyntien sneng kyntien kraw bad u la kren shibun haba ïadei bad ka mariang, ki jingeh-jingtynjuh bad kumta ka dei ka kamram jong baroh ban ïai kynmaw ïa ki ‘riewkhraw jong ka ri bad ka jaidbynriew.
“Ka don ka jingong ba lada ngi klet noh ïa la ki ‘riewkhraw, ka jaidbynriew kan duh noh,” u la ong.
Halor ka jingdawa ban pynrung noh ïa ka Ktien Khasi ha ka Khyrnit ba 8 ka Riti Synshar ka Ri, u samla Paliar haba pynkynmaw ïa ka jingmynjur ka Sorkar ïa ka rai hapoh ïingdorbar thawaiñ, u la buh jingkylli ba shano kata ka rai ka la poi ha kane ka khyllipmat ba mynta.
“Ïoh lehse ka sah tang ha ka jingkut noh ha kaba mynjur ïa ka rai hynrei kam don kano-kano ka jingbuddien. Kum ka seng bad ka jaidbynriew baroh kawei, ngi phah khubor sha ka Sorkar ba ka dei ban pynjur shuh-shuh ïa ka jingbuddien na ka Sorkar India khnang ba ka Ktien Khasi kan ïoh rung noh na ka Khyrnit kaba 8 ka Riti Synshar ka Ri,” u la ong.
U la ong ruh ba lada ka Ktien Khasi ka ïoh rung ha ka Khyrnit ba 8, kata kan myntoi shi kat dei ïa ka jaidbynriew.
Na ka liang u samla Reuben Najiar, uwei na ki nongïalam ka KSU, u la ong ba kum ki dkhot ka seng bad ki samla ka jaidbynriew ki dei ban bud nuksa ïa ka matti jong u Myllung Soso Tham.
“Ha ka jingïaid lynti jong u Myllung, um shym la ïoh ka jingithuh ha ka por ba u dang im, hynrei dei tad hadien, ngin sa sngewthuh ïa ka jingkordor jong ki kam jong u. Kumjuh ha ka jingïaid lynti jong ki dkhot ka seng, ngi lap bun ki jingtynjuh, bun ki jingeh bad lada ngi tlot ngi swai ha kum kine ki por, shaei ka lawei jong ka jaidbynriew,” u la buh jingkylli.
U samla Najiar u la pynsngew ruh ba u Myllung wat hapdeng ki jingeh bad jingban ka jingduk-jingjynjar hynrei um shym la ieh noh ïa ka kam jong u namar u sngewthuh ba kaei kaba u leh kan pynmyntoi ïa ka jaidbynriew hadien-habud.
Shuh shuh u la bynrap, “Kum kine ki jait jingtynjuh na ka por sha ka por ki ju wan. Kum ki para dkhot, ngi dei ban long kiba husiar bad kiba la khreh na bynta ka dawbah jong ka jaidbynriew.”
